PM Xanana konvida Prabowo vizita Timor-Leste
JAKARTA, 22 outubru 2024 (TATOLI) – Primeiru Ministru (PM), Kay Rala Xanana Gusmão, konvida Prezidente Repúblika Indonézia, Prabowo Subianto atu vizita Timor-Leste.
Xefe Governu hato’o pedidu referida ba Prabowo bainhira hasoru malu iha Palásiu Prezidensiál Jakarta.
“Primeiru Ministru transmite ba Prezidente Repúblika Indonézia Prabowo konvite ofisiál husi ita-nia Prezidente Repúblika, Ramos Horta, karik bele atu partisipa iha serimonia selebrasaun loron independénsia 28 novembru iha Timor-Leste,” Ministru Negósiu Estranjeiru no Kooperasaun (MNEK) Bendito Freitas hateten iha Jakarta, segunda ne’e.
Primeiru Ministru Xanana Gusmão manifesta intensaun prezensa Prabowo Subianto iha Timor-Leste tanba konsidera Indonézia inportante ha relasaun bilaterál.
Prezidente Repúblika Indonézia, Prabowo Subianto rasik seidauk fó serteza kona-ba konvite refereda tanba sei ajusta tuir ajenda estadu nian relasiona ho konferénsia internasionál hanesan G20 no APEC.
“Xefe Governu na’in-rua manfesta atensaun di’ak ba malu kona-ba oinsá nasaun rua bele serbisu hamutuk iha futuru atu kooperasaun ba área hotu-hotu,” Bendito Freitas akresenta.
Sorumutu Xanana Gusmão ho Prabowo Subianto nakonu ho jestu amigu no amigável ne’ebé fó sinál pozitivu ba relasaun bilaterál entre Timor-Leste ho Indonézia iha futuru.
Notísia relevante: Xanana-Prabowo diskute asuntu fronteira terrestre
Jornalista : Natalino Belo
Editór : Evaristo Soares Martins
