LIQUIÇA, 21 outubru 2024 (TATOLI) – Prezidente Autoridade Munisípiu (PAM) Liquiça, Paulino Ribeiro hateten, Programa Nasionál Dezenvolvimentu Suku (PNDS) ba tinan-2025 iha Munisípiu Liquiça hetan orsamentu hamutuk milaun $1.3.
“Iha tinan oin osan ba PNDS nian ita sei hetan millaun $1.3, ida-ne’e ba Suku hamutuk 23 iha Munisípiu Liquiça, ita hakarak mandatu Governu ida-ne’e hotu estrada sira iha Suku sira tenke di’ak hotu, PNDS nia ita sei hadi’a eskola sira aat ne’e, hadi’a dalan sira hakarak Munisípiu Liquiça ne’e povu tenke moris di’ak,” Paulino hateten iha Liquiça, segunda ne’e.
Autoridade másima Liquiça ne’e dehan, iha independénsia ida-ne’e povu hotu tenke moris di’ak hodi goza ukun aan ida-ne’e, povu labele sai espetadór iha ukun rasik aan ida-ne’e.
“Povu tenke goza ukun aan ida-ne’e; estrada tenke di’ak, eskola tenke di’ak, agrikultura tenke la’o di’ak, hadi’a fatin turizmu sira, hanesan agora iha tasi-ibun Kaitehu nian ita komesa hadi’a ona la kle’ur tan ramata, ida-ne’e atu responde ba libertasaun povu, iha era independénsia ida-ne’e,” nia tenik.
Tanba ne’e, PAM Liquiça, Paulino Ribeiro garante katak durante mandatu sei lori Liquiça sai di’ak, matak no mós tuir planu prioridade lima ne’ebé hatur ona iha nia promesa bainhira asumi kargu Prezidente Autoridade.
“Iha ha’u-nia mandatu tau prioridade ba programa importante ida mak infrastrutura báziku, hadi’a estrada, bee-moos, eletrifikasaun no ponte, rua mak hadi’a setór agrikultura, tolu hadi’a jestaun ba merkadu no turizmu, haat programa ba saúde no lima edukasaun. Programa lima ne’e iha ha’u-nia mandatu tenke rezolve no agora ita rezolve daudaun ona,” nia hakotu.
Notísia relevante:PNDS Liquiça implementa projetu 24 iha tinan ne’e
Jornalista: Hortencio Sanchez
Editór: Rafael Ximenes de A. Belo
