ANAAA re-akredita programa estudu enjeñaria mekánika iha UNTL
DILI, 23 outubru 2024 (TATOLI)–Ajénsia Nasionál Avaliasaun no Akreditasaun Akadémika, Institutu Públiku (ANAAA, I.P.) halo ona avaliasaun no re-akreditasaun ba programa estudu enjeñaria mekánika ho grau lisensiatura iha Universidade Nasionál Timor-Lorosa’e (UNTL).
Vise-Reitór ba Asuntu Akadémika no Garantia Kualidade, Samuel Venâncio de Sousa Freitas, hateten, kursu ne’e iha tinan 2018 konsege hetan avaliasaun, nune’e ho mudansa no progresu ne’ebé iha área oin-oin, maka presiza halo re-avaliasaun.
“Iha tinan 2018 departamentu ne’e hetan avaliasaun dahuluk ho valór B. Ita hein katak liuhusi re-avaliasaun ne’ebé ANAAA halo bele hetan progresu di’ak hodi kontribui hadi’a kualidade iha universidade, liu-liu departamentu sira,” Vise-Reitór hato’o iha ninia knaar fatin, kuarta ne’e.
Notiia relevante : ANAAA planeia halo akreditasaun ba programa 19 no instituisaun neen
Iha mudansa ba dosente sira, kurríkulu, infraestrutura no fasilidade, tanba ne’e presiza halo re-avaliasaun atubele hetan progresu di’ak liután.
Iha sorin seluk, Diretór Departamentu enjeñaria mekánika, Mário Cabral, hateten, preparasaun re-avaliasaun ba departamentu ne’e kuaze tinan-ida hodi priense dokumentu ne’ebé submete ba ministériu kompetente no ANAAA, tuir evidénsia ne’ebé iha.
“Tinan-lima liubá ami halo avaliasaun no hetan valór B, maibé iha tempu ne’ebá fasilidade mínimu tebes, nune’e ami koko no halo esforsu, espera katak ami bele hetan valór eselente ba re-avaliasaun ida-ne’e,” nia tenik.
Diretór Ezekutivu ANAAA, I.P, Nilton Paiva, hateten, objetivu husi avaliasaun no re-akreditasaun ida-ne’e maka atu asegura elijibilidade no kualidade programa estudu enjeñaria mekánika ne’ebé oferese husi UNTL.
“Prosessu avaliasaun no re-akreditasaun ne’e haktuir ba padraun no kritériu husi ANAAA no durante avaliasaun ida-ne’e avaliadór sira sei observa direita no halo konfirmasaun ba entidade sira relasiona ho relatóriu auto-avaliasaun ba kursu enjeñaria mekánika ne’ebé submete mai ANAAA,” nia dehan.
Atividade husi avaliasaun ne’e finaliza ho relatóriu provizóriu no rekomendasaun balun husi ekipa panel, ne’ebé pertinente tebes no rezultadu finál husi avaliasaun sei públika husi ANAAA iha tempu tuir mai hodi hadi’a programa estudu referidu.
Iha avaliasaun ida-ne’e reprezenta avaliadór internasionál husi Malaysian Qualifications Agency (MQA) no avaliadór nasionál sira seluk.
Jornalista : Osória Marques
Editora : Julia Chatarina
