DILI, 23 outubru 2024 (TATOLI)—Rejiaun Administrativa Espesiál Oé-Cusse Ambeno (RAEOA) ezekuta Orsamentu Jerál Estadu (OJE) 2024 to’o ona 43.13% husi montante millaun $60.
Notísia Relevante: PN aprova millaun $60 ba RAEOA
“Orsamentu 2024 ne’ebé aloka ba RAEOA millaun $60 fahe ba fonte finansiamentu rua (2), hanesan fonte finansiamentu ba RAEOA millaun $40 no Fundu Espesiál Dezenvolvimentu (FED) millaun $20. Ezekusaun ba orsamentu RAEOA ho konsolidadu millaun $60, dadus ikus iha 18 outubru 2024 ne’e atinje ona 43.13%,” Sekretária Rejionál Finansa RAEOA, Elvira de Carvalho Manat, hato’o iha audiénsia públika ba proposta Orsamentu Jerál Estadu (OJE) 2025 ho komisaun C, D, F no G, iha sala plenária Parlamentu Nasionál (PN), kuarta ne’e.
Difikuldade implementasaun ezekusaun OJE 2024 mak dahuluk RAEOA enfrenta difikuldade hala’o ezekusaun tanba problema irregularidade implementasaun serbisu ka projetu anteriór.
Daruak, nia dehan, serbisu balun seidauk iha estatutu ne’ebé klaru no datoluk prosesu hand over husi administrasaun sesante ne’ebé mak la klaru no ikus liu mosu despeza la prevista iha OJE RAEOA nian.
Autoridade garante, bainhira to’o iha tinan ida-ne’e nia rohan, ezekusaun OJE 2024 nian ne’e bele aumenta.
Deputadu membru komisaun D, Antoninho Bianco, hanoin presiza justifika didi’ak kona-ba dezáfiu sira-ne’ebé temi ne’e mak afeta ba ezekusaun orsmanetu ne’e sei kiik.
Deputada membru komisaun F, Lucia Taeki, preokupa tanba agora iha fulan-outubru no tina nida-ne’e atu ramata ona maibé RAEOA foin ezekuta 43, 13%.
Deputada membru komisaun D, Virginia Ana Belo, hateten ezekusaun la’ós problema tanba bele kompreende autoridade foin hahú serbisu no seida’uk to’o tinan ida, no kompreende razaun lubun ida aprezenta liga ba irregularidade no kondisaun saida mak bainhira autoridade simu serbisu hahú iha RAEOA.
Notísia Relevante: OJE 2024, RAEOA ezekuta 4% maioria selu saláriu no vensimentu
Jornalista : Nelson de Sousa
Editór : Cancio Ximenes
