DILI, 23 outubru 2024 (TATOLI)-Rejiaun Administrativa Espesiál Óe-Cusse Ambeno (RAEOA) husi fulan-janeiru to’o setembru 2024 ne’e, RAEOA rekolla ona reseita millaun $2,2.
Notísia Relevante: PN aprova millaun $60 ba RAEOA
“Hakarak aprezenta, iha jenieru to’o setembru 2024 ne’e, RAEOA rekolla ona reseita millaun $2,2,” Sekretária Rejionál Finansa, RAEOA, Elvira de Carvalho Manat, hato’o iha audiénsia públika ba proposta Orsamentu Jerál Estadu (OJE) 2025 ho komisaun C, D, F no G, iha sala plenária Parlamentu Nasionál (PN), kuarta ne’e.
Husi reseita ne’e fahe ba reseita fiskál ho totál kolesaun $632.332,37 no ba reseita não fiskál nian iha millaun $1,6.
Enkuantu, iha Orsamentu Jerál Estadu (OJE) 2024 ne’ebé aloka ba RAEOA iha millaun $60 fahe ba fonte finansiamentu rua (2) hanesan fonte finansiamentu ba RAEOA millaun $40 no Fundu Espesiál Dezenvolvimentu (FED) millaun $20.
Ezekusaun ba OJE 2024 RAEOA ho konsolidadu millaun $60, dadus ikus iha 18 outubru atinje ona 43.13%.
Ba iha proposta OJE 2025 RAEOA prevee millaun $62 no husi orsamentu ne’e fahe ba fonte finansiamentu rua (2) hanesan ba autoridade RAEOA no Fundu Espesiál Dezenvolvimentu (FED) ba autoridade RAEOA hetan alokasaun $36,001,473.00 hodi aloka ba saláriu ba saláriu vensimentu $14,662,131.00, bens no serbisu $10,125,289.00, transferénsia públika $4,214,053.00, kapitál dezenvolvimentu $7,000,000.00.
Ba Fundu Espesiál Dezenvolvimentu (FED) RAEOA $26,179,527 hodi aloka ba saláriu vensimentu $710,540.00, bens no serbisu $11,074,212.00, transferénsia públika $1,362,580.00, kapitál dezenvolvimentu $13,032,195.00.
Jornalista : Nelson de Sousa
Editór : Cancio Ximenes
