Estudante 198 husi munisípiu Manatuto la partisipa ezame nasionál 2024
DILI, 24 outubru 2024 (TATOLI)—Estudante 198 husi Ensinu Báziku terseiru siklu, Ensinu Sekundáriu Jerál (ESJ) no Ensinu Sekundáriu Tékniku Vokasionál (ESTV) husi munisípiu Manatuto, la partisipa ezame nasionál tinan 2024 nian.
“Husi númeru ne’e, razaun la tuir ezame diferente, balun tanba sai antes depois ezame períodu, balun sai depois períodu, no balun sai antes ezame nasionál tanba moras, nune’e ita seidauk hatene hira mak sei tama ba segunda xamada,” Diretór Servisu Edukasaun munisípiu Manatuto, Patrício da Cruz Quintão relata ba Agência Tatoli via telefónika, kinta ne’e.
Notísia relevante : Servisu Edukasaun Manatuto husu ME no MF aselera pagamentu konsensaun eskolár
Estudante Ensinu Báziku ne’ebé rejistu atu tuir ezame hamutuk 1.180 maibé ikus mai tuir ezame hamutuk 1.123 enkuantu la tuir ezame iha 57.
Estudante ESJ iha área Siénsia Teknolojia ne’ebé rejistu atu tuir ezame hamutuk 456, tuir ezame iha na’in-444, no la tuir ezame 12. Área Siénsia Sosiál no Umanitária ne’ebé rejistu atu tuir ezame hamutuk 396, tuir ezame hamutuk 282, no la tuir ezame 114.
Estudante ESTV ne’ebé rejista hamutuk 75, tuir ezame hamutuk 72, no la tuir ezame iha na’in-tolu.
“Ita só fó de’it oportunidade ba ezame nasionál emisaun daruak ba estudante hirak ne’ebe la tuir ezame tanba moras, maibé maioria estudante la fó informasaun ba eskola tanba sá la tuir ezame nasionál,” nia akresenta.
Iha sorin seluk, Diretór Servisu Edukasaun munisípiu Ainaro, Patrício da Costa Magno, relata, husi munisípiu Ainaro iha estudante 18 husi Ensinu Báziku no Ensinu Sekundáriu mak la partisipa ezame.
“Sira sei la tuir ezame nasionál segunda xamada tanba sai kleur ona, balun forma ona família no iha balun diploma laiha,” nia tenik.
Ezame nasionál iha Ainaro ne’e buat hotu la’o di’ak no laiha dezafiu, ne’ebé daudaun ne’e profesór iha kada eskola halo hela korresaun ba matéria lokál sira.
Jornalista : Osória Marques
Editora : Julia Chatarina
