DILI, 24 outubru 2024 (TATOLI)—Estudante timoroan hamutuk 534 hetan bolsa estudu hodi kontinua sira-nia estudu iha Indonézia.
“Husi fulan-setembru, iha bolsa estudu 534 ne’ebé fornese husi Universidade Indonézia husi Sabang to’o Merauke, ne’ebé hetan bolsa estudu balun no tipu sira seluk,” Adidu Edukasaun no Kultura husi Embaixada Repúblika Indonézia iha Timor-Leste (KBRI, sigla indonéziu), Ikhfan Haris, hateten iha abertura espozisaun edukasaun 2024, iha Pusat Budaya Indonesia (PBI), kinta ne’e.
Rejime bolsa estudu ne’e kompostu husi bolsa estudu parseiru país dezenvolvidu (KNB, sigla indonéziu), Darmasiswa, Ministeriu Finansa Timor-Leste inklui bolsa estudu jerál sira.
Notísia relevante : KBRI prepara universidade 60 husi Indonézia partisipa espozisaun edukasaun
Ikhfan Haris rekoñese katak númeru bolsa estudu sira-ne’e aumenta tanba espozisaun edukasaun ne’ebé Embaixada Indonézia realiza tinan-tinan dezde tinan 2016 ne’e atende universidade oin-oin husi Indonézia, ne’ebé bele hametin relasaun amizade país rua.
“Edukasaun mak forsa ba pás no bele hametin amizade ne’ebé mak haketak de’it iha administrasaun. Ami mós espera katak atividade espozisaunne’e bele sai ponte osan-mean ida ba ensinu superiór Indonézia no Timor-Leste atu esplora kooperasaun di’ak liután,” nia akresenta.
Embaixada Indonézia iha kompromisu atu suporta internasionalizasaun ensinu superiór Indonézia nian liuhusi fó bolsa estudu ba estudante estranjeiru sira inklui husi Timor-Leste.
Iha tinan 2022 to’o 2023, estudante hamutuk 719 simu ona bolsa estudu husi rejime finansiamentu oin-oin husi GFovernu no universidade sira. Husi tinan 2020 to’o 2023, Governu Indonézia liuhusi universidade oin-oin, ne’ebé fó ona bolsa estudu ba estudante Timor-Leste hamutuk 719 no aumenta tan ba estudante 1.253 iha tinan 2024.
Adidu Edukasuan no Kultura mós relata katak oras ne’e iha estudante maizumenus na’in-4.000 husi Timor-Leste mak estuda iha universidade oin-oin iha Indonesia. Númeru ne’e hatudu katak estudante sira husi Timor-Leste mak grupu boot liu entre estudante estranjeiru sira ne’ebé estuda iha Indonézia.
Jornalista : Osória Marques
Editora : Julia Chatarina
