DILI, 24 outubru 2024 (TATOLI)—Ministériu Juventude, Desportu, Arte no Kultura (MJDAK) propoin $9.472.726 iha Orsamentu Jerál Estadu (OJE) 2025 hodi finansia programa prioridade tolu hanesan programa institusional, inkluzaun sosiál, inklui kulturál no patrimóniu.
Orsamentu hirak ne’e fahe ba kategoria saláriu no vensimentu $2.729.571, bens no servisu $1.850.047, transferénsia públika $4.261.650, kapitál menór laiha no kapitál Dezenvolvimentu $631.458.
“Kompara ho tinan 2024 ami sae oituan kuaze 12%, tanba iha tinan 2024 ami hetan millaun $8,4,” Ministru Juventude Desportu Arte no Kultura, Nelyo Isaac Sarmento, hato’o hafoin ramata halo audiénsia públika kona-ba orsamentu ministériu ba tinan oin, iha Komisaun G ne’ebé trata asuntu Edukasaun, Juventude, Kultura no Sidadania, iha antigu edifísiu Ministériu Finansa, kinta ne’e.
Notísia relevante : KOICA koopera ho MJDAK fó formasaun ba treinadór futeból juvenil na’in-22
Programa dezenvolvimentu institusionál ho funsionamentu institusionál ne’e ko’alia kona-ba bens no servisu, hadi’a manutensaun ba kampu sira ne’ebé eziste iha Gleno, Bobonaro, Baucau no Dili, inklui halo manutensaun ba edifísiu MJDAK.
Programa inkluzaun sosiál hanesan apoiu halo serbisu área juventude desportu no arte kultura nia, liu-liu kona-ba formasaun ba joven sira, kompetisaun desportiva, ho fasilidade desportiva sira.
Programa kultura no patrimóniu ne’e sei apoiu ba grupu kultura, kona-ba festivál kultura sira-nia programa formasaun ba eskola sira, biblioteka, pintura inklui múzika. Kultura no patrimóniu ho orsamentu $833.172, fahe ba kategoria bens no servisu $225.772 no transferénsia públika $607.400.
Programa funsionamentu no dezenvolvimentu institusionál ho orsamentu $4.431.530, fahe ba kategoria saláriu no vensimentu $2.729.571, bens no servisus $1.589.558 no kapitál dezenvovimentu $112.401.
Enkuantu, inkluzaun sosiál ho orsamentu $4.208.024, fahe ba kategoria bens no servisu $34.717, transferénsia públika $3.654.250 no kapitál dezenvolvimentu $519.057.
Daudaun ne’e MJDAK nia ezekusaun orsamentu ba tinan 2024 atinje ona 77%.
“Espera fim do ano ne’e ita bele ezekuta to’o iha 99%,” nia tenik.
Jornalista : Osória Marques
Editora : Julia Chatarina
