VIQUEQUE, 24 outubru 2024 (TATOLI)—Servisu Agrikultura Viqueque iha tempu badak sei distribui fini batar ba agrikultór sira hodi kuda.
“Ami foin lalais simu ona tabela fini batar tonelada neen husi Asosiasaun Anaprofiku ne’ebé atu distribui mai munisípiu Viqueque. Agora iha prosesu hela, ne’ebé ita seidauk simu. Depois distribui mai ami maka sei kontinua distribui ba agrikultór sira hodi kuda iha sira-nia to’os iha époka ida-ne’e,” Diretór Servisu Agrikultura munisípiu Viqueque, Olívio Soares Freitas, informa ba Agência Tatoli, iha ninia knaar fatin, Beloi, kinta ne’e.
Fini sira-ne’e sei fahe agrikultór sira ne’ebé hakarak kuda iha postu lima hanesan Uatucarbau, Uatulari, Ossu, Lacluta no Viqueque Vila.
“Ita sei la fahe fini ba agrikultór hotu-hotu, maibé sei haree agrikultór sira-ne’ebé nesesáriu,” nia akresenta.
Notísia relevante : MAPPF hahú distribui fini batar ba agrikultór sira iha territóriu
Abitante munisípiu Viqueque barak maka husu Servisu Agrikultura apoiu tratór boot ba fila rai, maibé tratór ne’ebé iha mak seidauk halo manutensaun.
“Ami hakarak atu apoiu agrikultór sira hodi fila rai maibé tratór nia kondisaun a’at, ne’ebé hein hela bainhira maka halo manutensaun, karik manutensaun sedu ita sei fó apoia ba agrikultór sira, manutensaun tarde ita sei tau ba tinan oin. Ba tratór boot iha hela kombustível tonelada tolu, ne’ebé sufisiente hela,” nia tenik.
Tratór boot tuan iha unidade 39 maibé balun ho kondisaun a’at no seidauk halo manutensaun, enkuantu tratór boot foun iha unidade neen.
“Komunidade husu ajuda ba ami hodi fila rai, maibé tratór boot ho kondisaun a’at, ne’ebé agora daudaun ne’e tratór boot rua maka fila hela rai iha postu Viqueque Vila no postu Ossu,” Diretór hato’o.
Jornalista : Vitorino Lopes da Costa
Editora : Julia Chatarina
