Covalima entrega ona relatóriu ezekusaun orsamentál vizita Papa Francisco

COVALIMA, 25 Outubru 2024 (TATOLI) – Prezidente Komisaun Organizadora vizita Papa Francisco husi munisípiu Covalima, Miguel Armada Cardoso, aprezenta ona relatóriu ezekusaun orsamentál rihun $40 ba Governu sentrál.

Pfrezidente Autoridade Munisipál ne’e dehan verba ne’ebé Governu sentrál aloka ba Covalima ne’e ezekuta hotu ba item konsumu no aluga karreta 220 hodi tula peregrinu husi postu Fatululik, Fohorem, Fatumea, Tilomar, Maucatar, Suai no Zumalai hamutuk 4.500 hodi partisipa misa solene ne’ebé prezide husi Santidade Papa Francisco iha 10 Setembru, iha Tasi-Tolu, Dili.

“Ita entrega ona relatóriu ezekusaun orsamentu vizita Papa Francisco, maibé ita seidauk realiza enkontru enserramentu, sei hein konstrusaun gruta iha edifísiu Administrasaun Munisipál Covalima hafoin bele organiza reuniaun enserramentu ba komisaun organizadora”, Miguel Armada Cardoso informa ohin.

Haree ba ezekusaun orsamentál, prezidente ne’e rekoñese katak iha peregrinu balun han ladún di’ak, maibé autoridade jere osan oinsá bele fo han hotu sarani sira.

João Amaral ne’ebé partisipa iha misa Tasi-Tolu ne’e ne’e reforsa katak autoridade Covalima mobiliza peregrinu sira no la abandona nia komunidade, maske sira han tarde, maibé tanba preparasaun hahán ne’e ba ema barak entaun situasaun ne’e sempre akontese.

“Kona-ba han tarde ne’e la problema, tanba durante ne’e ita haree Papa Francisco iha de’it televizaun, maibé foin lalais ne’e ita haree direta ida ne’e orgullu”, nia realsa.

Lembra katak Papa Francisco hala’o nia viajen apostólika mai Timor-Leste iha loron 09 to’o 11 Setembru.  Durante loron tolu, Papa hasoru malu ho Prezidente Repúblika, José Ramos Horta, ho relijiozu no joven sira, ema ho defisiénsia no prezide misa iha Tasi-Tolu ne’ebé partisipa husi sarani katólika rihun 600-resin.

Iha vizita Papa nian, Governu Timor-Leste aloka millaun $12 ba halo despeza no husi montante ne’e ezekuta $9.978.658,12, ne’ebé rezulta iha saldu pozitivu hamutuk $2.021.341,12 no sei hatama fali ba kofre Estadu.

Montante ne’e Governu foti husi Fundu Kontinjénsia ba Komisaun Altu Nível Institusionál ba vizita Sua Santidade Papa Francisco hodi organiza atividade preparasaun ba vizita referidu durante loron tolu.

Notísia relevante: Covalima seidauk aprezenta relatóriu ezekusaun orsamentu ba vizita Papa Francisco

Jornalista: Celestina Teles

Editora: Maria Auxiliadora