INFORDEPE oferese manuál hodi apoia formasaun língua portugeza iha Oé-Cusse
OÉ-CUSSE, 25 Outubru 2024 (TATOLI) – Institutu Nasionál Formasaun Dosente no Profisionál Edukasaun (INFORDEPE) no Embaixada Portugál iha Timor-Leste disponibiliza livru manuál PRO-Portugês ba Autoridade Rejiaun Administrativa Espesiál Oé-Cusse Ambeno (RAEOA) hodi utiliza ba apoia formasaun língua portugeza.
Estáquio Bosco Soares, Koordenadór ba Projetu PRO-Português hateten livru ne’e nu’udar matadalan ida ba formadór sira atu uza bainhira fó rmasaun ba manorin sira.
“Livru sira-ne’e hanesan produtu ida husi Projetu PRO-Português ne’ebé fahe ba tolu – livru ida ba nivel A2, livru ba B1 no ida ba B2, inklui mós livru guia ba profesór sira. Ne’e hanesan kolesaun ida ba sira atu utiliza iha sira-nia vida profisionál, tanba livru ne’e iha matéria didátika bele uza iha formasaun”, nia salienta bainhira entrega livru sira-ne’e iha salaun Edukasaun Oé-Cusse, ohin.
Nia realsa katak livru hirak-ne’e entrega direta ba formadór sira iha Oé-Cusse hamutuk na’in-haat, kompostu husi formadór internasionál ida no timoroan tolu.
Iha fatin hanesan, Koordenadór PRO-Português Rejiaun Oé-Cusse, Jacinto Elo, nu’udar mós formadór lia-portugés sente kontente tanba livru sira-ne’e útil ba formadór sira.
“Livru ne’ebé oferese útil iha programa formasaun tuirmai. Kona-ba livru manuál kada nivel iha A2 ne’e iha modul hitu hanesan mós ho B1, matéria sira ne’e iha hotu manuál ida de’it, maibé iha formasaun ami fó tuir modul idak-idak tuir nia oras, tan ne’e ita agradese livru ne’e atu reforsa de’it”, nia relasa.
Notísia relevante: Manorin 85 iha RAEOA simu sertifikadu língua portugeza nivel B1 no B2
Jornalista: Abílio Elo Nini
Editora: Maria Auxiliadora
