DILI, 24 outubru 2024 (TATOLI) – Diretór Ezekutivu Institutu Nasionál Farmasia no Produtu Medikamentu (INFPM), Brigido Simões Dias, hateten INFPM halo ona pagamentu ba Empreza Salimagu kuaze millaun $4.2.
“Ita selu ona Empreza Salimagu kuaze millaun $4.2 tanba nia hatama ona medikamentu sira, tanba empreza ne’e rasik hatama ai-moruk desde hahú kontratu ne’e komesa hatama iha dezembru mai to’o iha inisiu outubro ne’e”, Brigido Simões Dias dehan iha nia kna’ar fatin INFPM Kampu Alor, ohin.
Dias dehan, item 930 ka 96% mak Empreza Salimagu hatama ona ba armajen no balun distribui ona ba fasilidade saúde no balun uza hotu ona.
“Item balun Salimagu seidauk hatama hotu, ezemplu; reazente balun ne’ebé mak ema halo kada fulan, entaun balun uza iha fulan ida nia laran bainhira la uza tenke expire, entaun sira tenke kordenada didi’ak ho fábrika atu bele pordús, bainhira mak to’o iha ne’e no bainhira mak loke hafoin uza, ida-ne’e tenke kalkula hotu, tanba ne’e mak empreza sei esforsu hela ba ida-ne’e tanba ita foin halo renovasaun kontratu iha jullu, nune’e nia bele hatama hotu sasan sira ne’e, entaun ita halo alterasaun ba nia kontratu to’o iha fulan-Outubru ida-ne’e”, nia afirma.
Antes ne’e, Prezidente Komisaun Resepsaun no Inspesaun husi Ministériu Saúde, Alipio da Costa, informa durante tinan ida, Empreza Salimagu hatama ona medikmentu balun ba armajen INFPM.
“Durante tinan ida nia laran Empreza Salimagu hatama ona medikamentu, reajente no konsumaveis, husi ne’e medikamentu hamutuk 279, konsumaveis hamutuk 80 item no reajentes 254”, Alipio da Costa esplika.
Nia dehan, item balun tama hotu ona no balun sei iha dalan tanba ne’e ekipa resepsaun sira hein hodi halo kompleta hafoin submete lista ba Ministra Saúde.
Tuir dadus hatudu katak husi janeiru to’o setembru, Empreza Salimagu no sira seluk hatama produtu medikamentu hamutuk 1.250.
“Hahú husi janeiru 2024 to’o mai setembru, empreza sira hatama produtu mediku hamutuk 1.250, ita distribui ona 1.229 item ba fasilidade saúde hamutuk 43 iha territóriu tomak”, Dias dehan
Jornalista : Felicidade Ximenes
Editór : Zezito Silva
