DILI, 25 Juñu 2026 (TATOLI)—Vise Primeiru-Ministru (PM), Francisco Kalbuadi Lay, ho nia komitiva hato’o omenajen ba Saudozu Antigu Prezidente Repúblika, Francisco Guterres “Lú Olo”.
“Ha’u iha hela Portugál mak rona Maun Lú Olo iis-kotu, no ha’u husu Primeiru-Ministru, Xanana Gusmão no fila kedas mai Timor. Nu’udár Governu ho estrutura tomak hato’o sentida kondolénsia ba família tomak no Komité Sentrál FRETILIN. Ita Timor lakon ema di’ak ida hanesan Lú Olo. Ha’u koñese nia dezde tun hosi ai-laran mai, maibé prontu, buat hotu-hotu Maromak mak deside nune’e ita reza nafatin atu Nai haraik fatin ne’ebé di’ak ba Maun Lú Olo,” Vise Primeiru-Ministru dehan ba jornalista iha Rezidénsia Faról, Dili, Kinta ne’e.
Notísia relevante: PM Interinu Assanami orienta eskola atu partisipa vizita kadáver Antigu Prezidente Lú Olo ba fatin destinadu
Nune’e, tuir Kalbuadi, liuhusi forsa ne’ebé parte hotu-hotu iha hodi tau hamutuk fó forsa ba família no ba oan ki’ak ho inan faluk.
“Ita hamutuk apoia malu nafatin hodi fó ba família liliu ba labarik sira-ne’ebé sei eskola hela, nune’e bele kontinua sira-nia estudu hodibele la’o tuir Saudozu Lú Olo nia ain-fatin,” Kalbuadi dehan.
“Ha’u hamutuk ho Maun Lú dezde 1999, ho kamarada sira seluk, Sekretáriu Jerál FRETELIN, Marí Alkatiri, to’o harii Asembleia Konstituinte no Saudozu Francisco Guterres Lú Olo sai Prezidente Asembleia Konstituinte,” Kalbuadi haktuir.
Sekretáriu Jerál CNRT ne’e informa katak Lú Olo ema ne’ebé gosta toka no nia (Kalbuadi) mós toka, saudozu ema ida ladún ko’alia barak.
Jornalista: Osória Marques
Editór: Xisto Freitas da Piedade
