DILI, 25 outubru 2025 (TATOLI)— Koordenadora Eskola Ensinu Báziku Filiál (EBF) Ai-mutin, Isabel Salsinha Alves de Jesus, preokupa ho komunidade ne’ebé hela besik eskola soe lixu arbiru iha eskola nia oin.
“Ita preokupa loos ba komunidade ne’ebé mak mai soe lixu iha loos parte eskola nia oin ne’e. Tanba ne’e buka meiu oinsá para muda lixeiru ne’e tau fali iha fatin seluk tanba foer ida-ne’e fó impaktu ba estudante sira ne’ebé mak eskola iha fatin ida-ne’e,” Koordenadora Eskola hateten iha ninia knaar fatin, Ai-mutin, sesta ne’e.
Notísia relevante : Jerente eskola labele kontrola estudante tanba morru protesaun a’at
Isabel Salsinha nota, foer sira ne’e mesak hahán restu no modo tahan, nune’e bele estraga ambiente.
“Hahán restu no modo tahan ne’ebé dodok ona, sira ne’e mak fakar iha ne’e, entaun iis no dada lalar mai nakonu loos iha ne’e. Komunidade mai soe lixu iha ne’e beibeik ona, dadeer ita mai ne’e foer nakonu ona iha eskola oin. Loloos ne’e komunidade mak iha konsiénsia tanba fatin ida-ne’e eskola atu ita-nia oan sira mai halibur hamutuk iha ne’e hodi tuir prosesu aprendizajen, entaun komunidade tenke iha konsiénsia atu labele lori foer ne’e ba butuk iha ne’ebá,” nia akresenta.
Tanba ne’e, Koordenadora husu ba autoridade lokál sira atu serbisu hamutuk nafatin hodi halo lixu fatin iha fatin seluk, nune’e komunidade labele mai soe lixu iha eskola oin.
Iha sorin seluk, Reprezentante komunidade Ai-mutin, Domingas Soares, husu ba autoridade lokál sira atu kria kondisaun ba komunidade ne’ebé mak hela iha areadór eskola, nune’e sira labele soe lixu arbiru tanba lixu sira bele lori moras ba estudante ne’ebé ho idade kiik.
“Autoridade lokál sira prepara hela fatin, nune’e bainhira komunidade soe foer karik bele tau iha laran, lae komunidade hotu mai bou iha eskola oin, entaun nia impaktu ne’e ba fali ita-nia oan sira. Eskola iha ne’e no ba ami viziñu sira tamba dala ruma foer sira ne’e asu dada tama to’o uma-laran. Dadeer-dadeer saneamentu sira mai hamoos maibé nia fatin ne’e dois,” nia tenik.
Eskola EBF Ai-mutin rejista estudante hamutuk 1.044, ho totál profesór 19 no saladeaula 10.
Jornalista : Osória Marques
Editora : Julia Chatarina
