COVALIMA, 28 Outubru 2024 (TATOLI) – Servisu Munisipál Edukasaun Covalima la simu reklamasaun husi eskola no alunu sira atu realiza ezame segunda xamada ba alunu na’in-14 ne’ebé foin lalais la tuir ezame nasionál ba tinan letivu 2024.
Xefe Departamentu Dezenvolvimentu Parke Eskolár, Beneditus Asa informa, Servisu Munisipál Edukasaun (SME), Covalima identifika alunu na’in-14 husi Ensinu báziku, ensinu Sekundáriu Jerál no Tékniku Vokasionál, husi totál 2,547, auzente iha ezame nasionál ba tinan letivu 2024.
“Ita atu realiza ezame nasionál ba segunda xamada depende husi eskola sira mak hato’o reklamasaun mai iha Sevisu munisipál Edukasaun Covalima, maibé to’o ohin loron ami seidauk simu reklamasaun atu realiza ezame segunda xamada,” Beneditus Asa dehan, iha Santa-Rosa, ohin.
Ministériu Edukasaun realiza ezame nasionál bazeia ba diploma ministeriál númeru 19/2020 ,19 maiu kona-ba regulamentu avaliasaun terseiru siklu ensinu báziku no diploma Ministeriál númeru 22/2020, 19 maiu regutamentu avaliasaun ensinu sekundáriu jerál.
Daudaun ne’e alunu sira finaliza ezame besik tama ona semana rua, maibé edukasaun Covalima la simu reklamasaun husi alunu no eskola atu realiza ezame segunda xamada ba alunu na’in-14 falta iha ezame nasionál.
Tuir regra, bainhira atu realiza ezame segunda xamada eskola presiza prense formatu hafoin Edukasaun Covalima relata ba iha Ministériu Edukasaun atu transporta pontu ezame husi nasionál mai iha Covalima.
Alunu-14 la tuir ezame mai husi eskola sira hanesan, Eskola Bázika Sentrál Ladi, Fatululik, Salele, Zumalai, Beco, Lontale no EBC Santo Luis ho alunu husi eskola Sekundáriu Jerál Públiku Suai no husi eskola Tékniku Vokasionál na’in-ida.
Nune’e Servisu Edukasaun Covalima realiza ona ezame nasionál durante loron lima hahú 14 -18 Outubru totál sentru ezame hamutuk 33. husi eskola ensinu báziku terseiru siklu públiku no pribadu 24 no sentru ezame ensinu sekundáriu públiku no privadu lima sentru ezame tékniku vokasionál haat.
Dadus alunu finalista husi munisípiu Covalima hamutuk 2,547 husi EBC na’in-1,376 ne’ebé na’in-12 la tuir ezame alunu husi eskola sekundáriu totál 949 tuir ezame nasionál 948 no husi eskola tékniku vokasionál na’in 225 na’in-ida auzente iha ezame.
Diretór Eskola Sekundáriu Públiku Suai Fernando Ferreira rekoñese alunu husi eskola sekundáriu Jerál Públiku Suai la tuir ezame nasionál ne’ebé hahú 14 remata iha 18 Outubru maibé to’o ohin loron eskola mós la hatene alunu nia paraderu.
“Ita atu realiza ezame nasionál segunda xamada maibé eskola rasik la hatene alunu nia razaun alunu na’in-ida ne’ebé la tuir ezame nasionál,oinsa mak bele realiza ezame segunda xamada” nia klarifika.
Notísia relevante:Alunu na’in-14 iha Covalima falta iha ezame nasionál
Jornalista: Celestina Teles
Editór: Rafael Ximenes de A. Belo
