DILI, 29 outubru 2024 (TATOLI)–Fundasaun Neon Metin fó konfiansa ba Reitór atuál Universidade da Paz (UNPAZ), Adolmando Soares Amaral, hodi kontinua re-eleitu ba períodu tinan 2024 to’o 2029.
“Ohin loron 29 outubru 2024, Fundasaun Neon Metin ne’ebé hamahan iha UNPAZ atu informa katak fundasaun ezerse ona ninia knaar no responsabildade hodi hili no nomea ona Reitór atuál ba períodu daruak, Adolmando Soares Amaral, nu’udar Reitór UNPAZ ba mandatu tinan 2022 to’o 2029,” Administradór Konsellu Administrasaun Fundasaun Neon Metin, José Menezes Soares da Costa, hateten iha konferénsia imprensa, iha resintu UNPAZ, tersa ne’e.
Fundasaun nia razaun kontinua tau konfiansa ba Adolmando Soares Amaral tanba nota katak durante ninia mandatu iha tinan-lima nia laran iha progresu di’ak no estabilidade iha kampus.
“Nune’e iha mandatu daruak ita nafatin fó konfiansa maibé regra ba nomeasaun ne’e só ba períodu dala-rua de’it no ida-ne’e ba daruak,” nia akresenta.
Notísia relevante : UNPAZ-UNDIL hasa’e kualidade liuhusi investimentu rekursu umanu iha rai-laran no rai-li’ur
Fundasaun Neon Metin deside fó pose ba Reitór re-eleitu iha loron 05 novembru 2024, ne’ebé iha serimónia ne’e sei partisipa husi Ministru Ensinu Superiór Siénsia no Kultura, José Honório da Costa Pereira Jerónimo.
Iha fatin hanesan, Reitór re-eleitu UNPAZ, Adolmando Soares Amaral, hateten, fundasaun fó nafatin konfiansa ba nia tanba haree husi aspeitu barak.
“Ha’u hanoin polítika UNPAZ ba mandatu tinan-lima ba oin aprezenta iha diskusaun bainhira iha pose maibé programa importante universidade ne’e ba oin mak konsentra iha peskiza no halo publikasaun. Ha’u hanoin mandatu tinan-lima ba oin mak ami hanoin atu tulun Governu no Estadu atu rekomenda buat balun,” nia tenik.
Reitór rekoñese, atu rekomenda presiza halo peskiza no organiza semináriu sira, nune’e Governu bele konsidera rezultadu peskiza, hafoin lori ba planu no halo polítika nune’e bele hatán ba problema balun.
Jornalista : Osória Marques
Editora : Julia Chatarina
