COVALIMA, 29 outubru 2024 (TATOLI)- Komandante PNTL Covalima, Superintendente Polísia Calisto Gonzaga husu ba sidadaun sira ne’ebé viajen husi Dili mai iha Suai, iha ámbitu loron santu no finadu, presiza ho kuidadu atu labele hetan dezastre.
“Sidadaun sira ne’ebé mak husi Dili viajen atu mai Suai hodi selebra loron boot finadu ho kuidadu uza transporte halai ho neneik nune’e labele hetan dezastre iha dalan,” Calisto Gonzaga akonsella, iha Santa-Rosa, ohin.
Tan ne’e, husi parte seguransa, iha komandu PNTL Covalima preparadu atu asegura seguransa ba sidadaun sira ne’ebé hakarak selebra loron boot finadu atu tau ai-funan iha semitériu públiku no fatin sira seluk.
Komandu nia preparasaun atu asegura seguransa ho konjunta ba sidadaun sira, selebra loron boot finadu, komandu presiza koopera malu hodi husu apoiu husi Unidade Espesiál, Batallaun Orden Públiku (BOP), Unidade Patrullamentu Fronteira (UPF), Unidade Polísia Marítima (UPM) no F-FDTL.
“Ita rezerva hela autoridade seguransa ne’ebé garante seguransa ba sidadaun sira hamutuk 200 ne’ebé mai husi F-FDTL iha Tilomar, UPF, UPM, BOP tanba tinan-tinan ita servisu hamutuk atu koloka seguransa ba semitériu públiku sira” nia dehan.
Komandu hakarak sidadaun sira uza oportunidade vizita rate ho livre iha kualker tempu, maibé importante presiza respeita malu no respeita fatin semitériu hanesan fatin ne’ebé atu tau ai-funan no fatin atu halo orasaun, la’ós fatin atu toka múzika no hemu tua
Tuir observasaun husi Tatoli iha Covalima nota katak, preparasaun atu selebra loron boot finadu iha loron 1 to’o 2 Novembru ne’e, daudaun ne’e sidadaun sira hamos ona rate iha semitériu públiku sira.
Notísia relevante:PNTL Viqueque preparadu asegura seguransa iha loron finadu
Jornalista: Celestina Teles
Editór: Rafael Ximenes de A. Belo
