DILI, 29 outubru 2024 (TATOLI)—Southeast Asian Ministers of Education Organization (SEAMEO) hili Timor-Leste hodi lansa relatóriu Global Education Monitory (GEM) no introdús uzu teknolojia edukasaun iha Sudeste Aziatiku.
Atividade ne’e akompaña direta husi Ministériu Edukasaun (ME), United Nations International Children’s Emergency Fund (UNICEF) no parseiru sira seluk.
“Relatóriu ne’e hanesan relatóriu jerál ida kona-ba uzu teknolojia iha edukasaun Sudeste Aziátiku no relatóriu ne’e SEAMEO mai hili lansa iha Timor-Leste, iha ne’ebá hakerek mós kona-ba oinsá mak uzu teknolojia iha nasaun seluk inklui Timor-Leste. Iha relatóriu ne’e haree mós katak Timor-Leste mós ita la atrazadu liu,” Ministra Edukasaun, Dulce de Jesus Soares, informa iha sala konferénsia imprensa ME, Vila-Verde, tersa ne’e.
Notísia relevante : ME halo abertura distribuisaun pontu ezame nasionál ba Servisu Edukasaun munisipál
Timor-Leste hahú ona uza teknolojia iha tinan kotuk iha tempu COVID-19 nian, ne’ebé mak Governu hahú ho programa ‘eskola ba uma’.
“Tuir fali eskola iha uma nomós instala ona internet iha eskola ensinu sekundáriu balun inklui ensinu báziku iha tinan 2023. Ita mós uza rede sosiál ruma hodi halo komunikasaun ho eskola, nune’e mós Inspetór eskolár, Superintendete no Servisu Edukasaun Munisipál,” nia akresenta.
Teknolojia ne’e sira implmenta ona, liu-liu ba sira ne’ebé mak hetan ona apoiu husi Governu australianu no amerikanu liuhusi programa Hatutan no programa ALMA, inklui serbisu hamutuk ho Banku Mundiál ne’ebé mak aplika ona teknolojia iha prosesu aprendizajen.
“Apoiu ne’ebé mak mai husi parseiru sira ne’e daudaun sira koko aplika ona teknolojia iha prosesu aprendizajen, maibé la kobre eskola hotu iha programa monitorizasaun saladeaula observasaun, nune’e monitorizasaun profesór sira ita uza ona teknolojia liuhusi uza tablet ne’ebé mak fahe ba profesór sira,” nia tenik.
Jornalista : Osória Marques
Editora : Julia Chatarina
