DILI, 30 outubru 2024 (TATOLI)—Fundu Dezenvolvimentu Kapitál Umanu (FDCH, sigla portugés) haruka ona bolseiru 180-resin hodi kontinua estudu iha rai-li’ur, desde janeiru to’o outubru 2024.
“Ita haruka sira kontinua estudu tanba sira presiza hakle’an tan matenek hodi nune’e bele atende serbisu iha rai-laran hodi kontribui ba nasaun,” Diretór Ezekutivu FDCH, Júlio Aparício, hateten, iha ninia knaar fatin, Palásiu Governu, kuarta ne’e.
FDCH halo kooperasaun ho Aeroportu Navegasaun Aérea Timor-Leste, Empreza Públika (ANATL., E.P) hodi haruka bolseiru sira bá Indonézia, nune’e mós Ministériu Finansa (MF) no Ministériu Saúde (MS) hodi haruka estudante hala’o estudu iha Cabo-Verde, Malázia, Tailándia, Cuba, no Brazíl.
“Sira-ne’e ba área oin-oin no nível lisensiatura, mestradu, doutoramentu inklui diploma,” nia akresenta.
Notísia relevante : FDCH tinan oin prioriza bolsa estudu ba espesialista iha área oin-oin
Bolseiru sira liuhusi teste mak foin kontinua estudu no laiha rekomendasaun ruma husi ema seluk ka instituisaun sira.
“Ne’e ba bolsa méritu, katak buat hotu liuhusi teste ne’ebé justu no laiha rekomendasaun. Ami serbisu hamutuk ho instituisaun sira iha rai-li’ur ne’ebé ita-nia bolseiru sira atu bá ne’e no sira mak mai fó teste. Ita-nia juri ne’ebé iha mai husi Ministériu Ensinu Superiór, Siénsia no Kultura (MESSK) inklui no Ministériu Planeamentu no Investimentu Estratéjiku (MPIE), ne’ebé buat hotu la’o ho transparánsia no laiha rekomendasaun,” nia tenik.
FDCH daudaun ne’e serbisu hamutuk ho liña ministeriál hotu, nune’e bainhira bolseiru sira ramata estudu, bele kontinua serbisu iha instituisuan Estadu sira.
“Ita serbisu hamutuk ho liña ministeriál sira nune’e responsabilidade ne’e ita hotu nia, tanba ita lakohi ita haruka tiha sira bá, bainhira mai fali ministériu sira la uza ne’e ita gasta osan saugati loos,” Diretór hato’o.
Aleinde ne’e, FDCH daudaun ne’e halo estudu mapamentu ho liña ministeriál sira nomós iha munisípiu sira atu haree rekursu sira iha kada liña ministeriál inklui iha munisípiu.
“Nune’e, ita bele hatene ida-ne’ebé mak sei menus mak ita haruka bá, labele haruka de’it bá, bainhira fila mai sira la uza, ita lori bá sira dehan ami-nia ema nakonu hotu ona. Tanba ida-ne’e mak ita halo hela estudu mapamentu ne’ebé fulan-dezembru ne’e sei hotu. Depois ami sei aprezenta rezultadu peskiza sai livru ida hodi aprezenta ba Konsellu Administrasaun, hafoin aprezenta mós iha Konsellu Ministru hodi nune’e ba oin FDCH bainhira atu haruka ema bá eskola tenke bazeia ba estudu mapamentu,” Júlio Aparício, esplika
FDCH hahú husi tinan 2011 to’o 2023 fó ona bolsa estudu ba ema 11.000-resin, ne’ebé maioria serbisu hotu ona no sai funsionáriu iha liña ministeriál sira. Iha ema 5.000-resin mak ativa hela no restu hotu ona.
Rejista mós katak, bolseiru hamutuk 400-resin ne’ebé eskola iha Portugal, iha tinan 2011 to’o 2024 la ramata tuir data ne’ebé determina. Estudante hirak ne’e muda bá nasaun sira iha Europa hodi serbisu no balun isin-rua.
“Ami sei haree no buka tuir hodi multa, maibé ita sei haree didi’ak lai, tanba se ita ba ezije maibé sura osan laiha oinsá, ne’ebé ita sei haree didi’ak ida-ne’e no ita sei hadi’a sistema no diploma ministeriál para kesi metin ema sira ne’ebé ita fó bolsa, nune’e labele mosu tan fallansu sira ne’ebé la’o, selae akontese tiha ema hotu fase liman, fó sala ba FDCH, fó sala ba estudante no seluk tan, maibé haluha katak ita hotu kontribui ba fallansu ne’e. Ne’ebé ba oin ita sei haree ida-ne’e no hadi’a,” nia dehan.
Jornalista : Osória Marques
Editora : Julia Chatarina
