DILI, 30 outubru 2024 (TATOLI)–Governu liuhusi reuniaun ordinária Konsellu Ministru (KM), kuarta ne’e, aprova no deside extende suspensaun prátika arte-marsiál to’o tinan oin.
“Konsellu Ministru hala’o sorumutu iha Palásiu Governu no aprova projetu rezolusaun Governu nian ne’ebé estende to’o loron 10 abríl 2025, suspensaun ba ensinu, aprendizajen no prátika arte-marsiál no enserramentu temporáriu ba fatin no instalasaun hotu-hotu ne’ebé destinadu ba ensinu, aprendizajen no prátika arte-marsiál, ne’ebé inisialmente hetan aprovasaun husi rezolusaun Governu nú.17/2024, loron 24 abril,” referida nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : Komandu PNTL husu membru ne’ebé envolve arte-marsiál entrega atributu organizasaun
Rezolusaun Governu ne’e ho objetivu atu konsolida no reforsa pás sosiál ne’ebé alkansa ona husi kedas novembru 2023.
Aleinde ne’e, Governu hakarak atu iha futuru bele permite prátika arte-marsiál nian iha de’it kontestu desportivu hodi promove ezersísiu saudável no kontribui ba edukasaun no formasaun sívika no umanista ba joven sira.
“Iha tempu ida-ne’e nafatin mantein suspensaun ba ensinu, aprendizajen no prátika arte-marsiál no enserramentu temporáriu ba ninia fasilidade sira,” nota husi Governu fó sai.
Nune’e, Governu felisita populasaun, liu-liu joven sira, ba kolaborasaun ne’ebé sira presta ona hodi kumpre rezolusaun Governu nú. 17/2024, loron 24 abríl, ne’ebé kontribui tebes ba manutensaun orden no pás sosiál iha país laran tomak.
Antes ne’e, Governu suspende atividade arte-marsiál hotu hahú iha loron 10 novembru 2023 to’o 10 novembru 2024, inklui enserramentu lokál no instalasaun hotu ne’ebé hala’o atividade sira, sein autorizasaun legál.
Jornalista : Osória Marques
Editora : Julia Chatarina
