OÉ-CUSSE, 30 Outubru 2024 (TATOLI) – Natar-na’in-sira iha Kolomboe-Ana, suku Lifau, sub-rejiaun Pante Makasar, husu Autoridade Rejiaun Administrativa Espesiál Oé-Cusse Ambeno (RAEOA), liuliu Servisu Agrikultura atu apoia tratór hodi utiliza ba halai natar.
Agrikultór sira-ne’e hato’o preokupasaun iha ámbitu kolleta hare membramo ektare hitu iha natar Kolomboe-Ana, tersa ne’e.
“Ami hakarak hato’o ami-nia preokupasaun ida ba autoridade RAEOA, liuliu Agrikultura tenki tau-matan ba ami. Ami-nia difikuldade boot mak tratór. Dezde Governu Dahuluk kuandu fahe tratór ba natar sira, ami iha natar Kolomboe lahetan ida”, natar-na’in Deolindo Abi aprezenta nia lamentasaun.
Notísia relevante: Autoridade RAEOA kolleta hare membramo ektare hitu iha suku Lifau
Iha fatin hanesan, agrikultór Domingos Eco dehan, kada tinan sia, tenke aluga tratór ho presu $100 mak foin bele halai natar, tanba ne’e sira husu Governu atu apoia tratór ba sira.
“Ami rona, foin daudaun, Governu oferese ona [tratór] mai RAEOA, se bele rejista mós ami iha natar Koloboe atu hetan netik tratór ida”, nia salienta.
Hatán ba preokupasaun ne’e, Sekretária Rejionál ba Asuntu Agrikultura, Peska, Pekuári no Floresta, Filomena Sila, informa ba natar-na’in sira atu submete pedidu mak foin bele hetan tulun.
“Foin daudaun ita hetan ona apoia [mákina] husi Ministériu Agrikultura. Iha hand tractor 25 no tratór boot rua, tanba ne’e ami persiza simu proposta husi natar-na’in, bainhira ami akumula ona proposta sira-ne’e, ami sei haree ida-ne’ebé merese atu simu apoia tratór ne’e. Tanba ne’e, ami husu ba natar na’in-sira persiza hamutuk halo proposta ida hatama ba agrikultura”, nia dehan.
Notísia relevante: MAPPF entrega ofisialmente ekipamentu agríkola ba autoridade RAEOA
Tuir dadus, suku Lifau iha área halo natar nian hamutuk lima mak natar Usapi ho nia área kultivu ektare hitu, Kolomboe-Ana ektare hitu, Kakatua neen, Sutnana 0,25 no Tualeu 1,5. Husi fatin sira ne’e rejista natar-na’in 40.
Jornalista: Abílio Elo Nini
Editora: Maria Auxiliadora
