DILI, 30 outubru 2024 (TATOLI)—Governu liuhusi reuniaun ordinária Konsellu Ministru (KM), kuarta ne’e, aprova ona rezolusaun kona-ba kumprimentu rejime inskrisaun no obrigasaun kontributiva iha ámbitu rejime kontributivu seguransa sosiál nian, ne’ebé aprezenta husi Ministra Solidariedade Sosiál no Inkluzaun, Verónica das Dores.
“Rezolusaun Governu ida-ne’e determina katak entidade hotu-hotu iha administrasaun direta no indireta Estadu tenke regulariza inskrisaun ba sira-nia traballadór sira iha Institutu Nasionál Seguransa Sosiál (INSS) to’o loron 15 novembru 2024, nune’e mós submete deklarasaun remunerasaun mensál to’o loron 15 kada fulan,” referida nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : INSS husu rekursu umanu liña ministeriál hotu aprezenta deklarasaun mensál remunerasaun
Aleinde ne’e, INSS sei fornese iha ninia website tabela sira ne’ebé presiza tuir online to’o loron 30 novembru 2024 no sei aprezenta ba KM lista entidade sira ne’ebé iha inkumprimentu.
Inkumprimentu ba rezolusaun ida-ne’e sei afeita ba sira ne’ebé responsável ba servisu no entidade administrasaun Estadu direta no indireta, ne’ebé ho kompeténsia halo inskrisaun ba traballadór sira bele entrega deklarasaun remunerasaun kada fulan iha responsabilidade sivíl, finanseira, reintegratória no dixiplinár tuir kazu ne’ebé iha.
Diploma ida-ne’e reforsa devér Estadu, ne’ebé konsagra ona iha artigu 56.º Konstituisaun Repúblika, hodi organiza sistema seguransa sosiál ne’ebé proteje traballadór hotu iha setór públiku no privadu, no asegura direitu ba seguransa no asisténsia sosiál.
Sistema seguransa sosiál estabelese husi lei nú. 12/2016, loron 14 novembru, vigora dezde tinan 2017 no define responsabilidade husi entidade empregadór sira, inklui inskrisaun traballadór sira no entrega fulan-fulan deklarasaun remunerasaun ba INSS.
Jornalista : Osória Marques
Editora : Julia Chatarina
