DILI, 28 juñu 2024 (TATOLI) – Institutu Nasionál Seguransa Sosiál (INSS) solisita ba rekursu umanu liña ministeriál no órgaun Estadu hotu atu aprezenta deklarasaun mensál remunerasaun ba INSS hodi bele hatene kontribuisaun funsionáriu sira-nian ba seguransa sosiál.
Prezidente INSS, Arlindo Pinto, informa katak institutu haruka ona sirkulár ba empregadór sira iha administrasaun públika, liuliu ba liña ministeriál sira no órgaun soberanu sira atu kada fulan sira-nia rekursu umanu aprezenta deklarasaun remunerasaun ba iha INSS hodi hetan Númeru Indentidade Seguransa Sosiál (NISS), nune’e kada funsionáriu bele hatene sira-nia kontribuisaun sira no aban bainrua sei simu hira.
“To’o agora, rekursu umanu husi liña ministeriál no órgaun soberanu sira seidauk aprezenta deklarasaun remenerasaun. Nune’e, ha’u husu ba rekursu umanu sira bele aprezenta deklarasaun remunerasaun mai ami, nune’e bele atribui NISS ba imi hodi bele hatene durante imi halo kontribuisaun ba seguransa sosiál ne’e”, Arlindo Pinto hateten iha nia knaar fatin, Caicoli, Dili.
Dirijente ne’e esplika katak NISS ne’e importante ba funsionáriu ka traballadór sira ne’ebé durante ne’e halo kontribuisaun ba seguransa sosiál, maibé tanba liña ministeriál no órgaun soberanu sira la hatama deklarasaun mensál remunerasaun ba INSS, entaun foin lalais halo de’it lansamentu atribuisaun kartaun NISS ba setór privadu sira.
Empreza ne’ebé durante ne’e rejistu ba seguransa sosiál hamutuk 5.175, husi númeru ne’e, empregadór ne’ebé la kontribui ona ba seguransa sosiál hamutuk 2.900.
“Husi traballadór setór privadu ne’ebé kontribui ba seguransa sosiál ne’e hamutuk 69.326. Ida ne’e ita fahe ba parte rua, ida ne’ebé la kontribui ona rihun 34 no ativu kontribui ne’e hamutuk rihun 35-resin,” nia hateten.
Nia salienta katak setór privada sira hanesan empregadór no traballadór ne’ebé kontribui ba segurasa sosiál halo mudansa signifikaiva, tanba referénsia anteriór husi 2023 hatudu katak kontribuisaun husi setór privadu hamutuk $14.411.230 no, iha 2024, husi janeiru to’o maiu, kontribuisan hamutuk $6.663.053.
Tanba ne’e, responsabilidade husi INSS nian mak prepara kondisaun hodi atribui NISS ba setór privadu sira, nu’udar baze identidade pesoál kontribuinte hodi rekere ba seguransa sosiál iha tempu oin mai bainhira sira reforma ka mate, família sira hanesan feen, laen no oan sira bele rekere sira-nia direitu ba subsídiu mate no pensaun sobrevivénsia iha seguransa sosiál.
“Ohin loron ita tama ona faze dijitalizasaun nian, nune’e konsidera ba Lei númeru 12/2016, 14 Novembru, iha artigu 25 ne’ebé kria Rejime Kontribuu Seguransa Sosiál, katak ho inskrisaun ba sistema sosiál sei iha identifikasaun ba rejime jerál liuhusi númeru Identifikasaun Seguransa Sosiál ne’ebé ho karakterístiku vitalícia [kartaun bele lori permanente to’o vida ramata]”, nia realsa.
Notísia relevante: MSSI atribuisaun kartaun NISS ba setór privadu sira
Jornalista : Arminda Fonseca
Editora: Maria Auxiliadora
