BAUCAU, 01 novembru 2024 (TATOLI) – Komandu Polísia Nasionál Timor-Leste (PNTL) Munisípiu Baucau kontinua garante seguransa ba komunidade durante realizasaun loron finadu.
Komandante PNTL Munisípiu Baucau, Superintendente António Maria de Sá, esplika, seguransa iha Baucau parte PNTL hamutuk ho FALINTIL-FDTL trasa ona planu operasaun koordenada finadu liuliu sei fó seguransa másimu ba komunidade selebrasaun loron finadu.
“Ita kontinua realiza hodi prevene situasaun, labele prezudika ba ema-nia vida, viajen ba tau ai-funan ba matebian ne’e la’o ho seguru,” Komandante PNTL Munisípiu Baucau hateten iha Vila Nova, sesta ne’e.
Liuhusi planu operasaun konjunta, parte seguransa sei halo patrullamentu rútina hodi garante komunidade sira nia movimentu ligadu ho kari ai-funan no sunu lilin kada semitériu.
Forsa konjunta identifika ona semitériu públiku sira no sei destaka membru sira hodi halo seguransa inklui la autoriza sidadaun atu lori sasán kro’at ba semitériu.
“Ita kontinua hasa’e volume no intensifika liután ita-nia vizibilidade iha terrenu,” António akresenta.
De Sá, husu joven sira atu evita konsume alkól iha fatin públiku no kria perturbasaun iha kada bairru nune’e ema hotu bele hakmatek hodi selebra loron matebian ho domin.
Forsa konjunta sei halo patrullamentu durante 24 oras no sei foti medida prevensaun bainhira iha indísiu mosu perturbasaun iha fatin públiku.
Notísia relevante: Ema tuda karreta iha Triloka, rezulta membru seguransa na’in-tolu kanek
Jornalista : Natalino Belo
Editór : Evaristo Soares Martins
