BAUCAU, 01 outubru 2024 (TATOLI) – Ema tuda karreta iha área Triloka, postu Baucau Vila, munisípiu Baucau, rezulta seguransa na’in-tolu hetan kanek.
Komandante Polísia Nasionál Timor-Leste (PNTL) Munisípiu Baucau, Superintendente Xefe António de Sá, esplika, kazu referida akontese iha loron-kinta, 31 outubru, oras 23:00.
Vítima mai husi membru F-FDTL Identidade Laurentino “Ular” hetan kanek bainhira hamutuk ho família (oan na’in-tolu) viajen husi Dili ho transporte privadu xapa-matríkula A.24-841 TL, maibé too iha área Aubaka, Triloka hetan tuda hodi rezulta karreta rahun iha parte vidru oin, kotuk no janela liman loos nian.
“Problema hodi kalan nee mós ita-nia membru na’in-rua kanek hanesa OPS ida hetan tuda iha nia ulun kanek, no ida fali tuda iha parte hirus matan,” Komandante PNTL Munisípiu Baucau hateten iha Vila Nova, sesta ne’e.
Membru PNTL hetan kanek bainhira to’o iha terrenu hodi halo atuasaun ba kazu referida kompostu Ofisiál Polisiamentu Suku (OPS) suku Triloka no na’in-ida seluk nu’udar membru intelijénsia.
PNTL Baucau to’o kedas fatin akontesementu hodi halo atuasaun no rekolla evidensia hanesan karreta inklui kaptura suspeitu na’in-lima ho autór prinsipál inisial M ne’ebé detein ona iha sela komandu munisipál.
“Hodikalan ita kaer suspeitu na’in-rua ho situasaun fragante delitu no na’in-tolu seluk ohin dader mak kaer tán,” António akresenta.
Kazu referida sei kontinua prosesu investigasaun antes aprezenta ba Ministériu Públiku (MP) tanba utiliza arma branka ne’ebé evidénsia sira asegura ona iha komandu Polísia Baucau.
Jornalista : Natalino Belo
Editór : Evaristo Soares Martins
