DILI, 04 novembru 2024 (TATOLI)—Membru Parlamentu Nasionál (PN) liuhusi Deputadu bankada CNRT, Natalino dos Santos, preokupa ho konstrusaun monumentu 12 novembru ne’ebé to’o agora la’o neineik no seidauk finaliza, mezmu la kle’ur tan Timor-Leste sei komemora loron masakre Santa Krús ba da-33 (12 novembru 1991-12 novembru 2024).
Notísia Relevante: Estátua ba Monumentu 12 Novembru sei hatuur iha tinan 2025
“Husu ba kompañia ne’ebé kaer obra tenke aselera lalais, tanbasá mak to’o ohin loron seidauk finalzia. Ida-ne’e responsabilidade kompañia Bobolait, tanbasá faillansu ne’e iha. Ne’ebé, atu halo konsertasaun ho Governu liuliu ministériu kompetente atu haree projetu ne’e lalais,” nia hateten ba jornalista sira iha resintu PN, segunda ne’e.
Nia konsidera, konstrusaun ba obra ne’e kle’ur tebes ona, nune’e husu ba Governu no empreza atu presiza aselera.
Deputadu FRETILIN, Joaquim dos Santos, hateten konstrusaun monumentu 12 Novembru ne’e la’o kle’ur ona no to’o agora seidauk finaliza nune’e presiza aselera.
Monumentu ne’e, nia dehan, konsidera valór istóriku juventude loríku asswa’in ne’ebé kontribui ba prosesu luta libertasaun nasionál, hodi fó mensajen ba jerasaun tuir mai atu hatene istória no monumentu ne’e nu’udar simbólu orden ne’ebé atu valoriza joven sira iha tempu ne’ebé ninia partisipasaun iha luta.
Nonumentu ne’e importante, nune’e nia sujere presiza halo mudansa uitoan ba estrutura, monumentu presiza dezeñu di’ak ida-ne’ebé reflete ba istória, la’ós atu halo de’it krús ka estátua.
Se nune’e, ida-ne’e la reprezenta valór juventude nian, nune’e presiza iha kontestu ida integradu hahú husi ne’ebé mak mai to’o iha 12 novembru 1991, entaun elementu sira-ne’ebé kompoin prosesu ne’e tomak tenke mosu iha monumentu.
Presiza halo reflesaun
Aleinde ne’e, Deputadu husi bankda CNRT, Natalino dos Santos, hateten la kle’ur tan Timor-Leste sei komemora loron masakre Santa Krús ba da-33 (12 novembru 1991-12 novembru 2024) no komemorasaun loron nasionál juventude, nune’e timoroan hotu presiza halo reflesaun ba loron importante ne’e.
“12 novembru nu’udar loron importante, ita konsidera loron nasionál ba juventude, entaun husu halo reflesaun hanesan mós mate restu 12 novembru, atu husu ba kompatriota sira 12 novembru no ba juventude sira oinsá ita kontribui ba dezenvolvimentu liliu papél juventude saida mak ita atu halo,” nia dehan.
Hanesan uluk, nia hateten, dedikasaun ba prosesu luta libertasaun konsege liberta duni no agora juventude sira ohin loron atu banati tuir juventude loriku asswa’in sira uluk hamutuk luta ba libertasaun pátria.
Kompatriota 12 novembru hotu ne’ebé sei moris atu partisipa ativu iha komemorasaun loron importante ne’e atu bele fó mensajen no konta istória ba jerasaun foun sira, atu bele hatene loron 12 novembru nu’udar masakre Santa Krúz hanesan parte importante iha prosesu luta, iha altura ne’eba mundu rekoñese lori juventude loríku assawa’in mate no loke mundu nia matan entaun tau matan ba Timor-Leste.
“Reflesaun joven sira katak, Estadu ne’e hamriik naran Repúblika Demokrátika Timor-Leste tanba ema hotu-hotu nia sofrimentu, entaun joven ida ohin loron atu kontinua sira-nia prosesu ba dezenvolvimentu liuliu kontribui kria pás no estabilidade iha ida-idak nia suku no bairru,’’ nia hateten.
Jornalista : Nelson de Sousa
Editór : Cancio Ximenes
