DILI, 21 outubru 2024 (TATOLI)–Prezidente Autoridade Munisípiu Dili (AMD), Gregório Saldanha, hateten estátua ba Monumentu 12 Novembru ne’ebé konstrui iha Portugál ne’e seidauk bele hatuur iha odamatan boot semitériu Santa Crúz nia leten iha 12 novembru 2024, maibé sei hatuur iha tinan oin (2025).
Notísia Relevante: Estátua ba monumentu 12 Novembru prosesa hela iha portugál
Nia hateten, estátua ba Monumentu12 Novembru ne’e atu koloka odamatan boot iha semitériu Santa Crús nia leten ne’e, daudaun ne’e pesoál tékniku husi MInistériu Asuntu Kombatente Libertasaun Nasionál (MACLN, sigla protug’es) no Komité 12 Novembru dezloka ba Portugál hodi haree estátua ne’ebé konstrui iha Portugal ne’e atu lori mai Timor-Leste.
“Aban bainrua ne’e ita sei monta estátua ne’ebé konstrui iha Portugál ne’e iha monumentu 12 Novembru iha Semitériu Santa Crús ne’ebá ne’e. Tinan ida-ne’e liuliu iha 12 novembru 2024 ne’e, ita la biban atu monta estátua ne’e maibé sei monta iha iha tinan oin,” Prezidente Autoridade Munisíu Dili (AMD), Gregório Saldanha, hateten ba Agência TATOLI hafoin partisipa programa “Entrevista Eskluziva” iha estúdio Faról.
Entretantu, nia hateten, semitériu Santa Crús hanesan fatin patrimóniu Estadu no patrimoniu povu tomak nian ne’ebé ema hotu no Komité 12 Novemvru harii Monumentu 12 Novembru nian, nune’e nia garante familia sira sei iha konxiénsia atu muda rate balun iha semitériu Santa Crús nia laran, hodi loke dalan ba Sebastião Gomes nia kampa.
Implementasaun projetu konstrusaun Monumentu 12 Novembru ne’e agora la’o neineik tebes, tanba Governu troka malu no familia sira balun seidauk muda sai matebian balun sira-nia rate iha semitériu laran ne’e.
Notísia Relevante: Modelu estátua 12 Novembru “joven sira kaer bandeira hamriik iha portaun leten”
“Ha’u fiar sira sei hakarak atu muda rate sira-ne’e, tanba balun konkorda no balun la konkorda tanba lisan ka tradisaun kulturál. Fiar katak kolega sira sei konkorda hotu atu dalan bele luan. Tanba, ita respeita ita-nia mate sira. Bu’at sira-ne’e sei rezolve tuir nia tempu,” nia dehan.
Tanba, tuir nia, atu dalan bele nakloke ne’e tenke respeitu no dignifika rate sira-ne’e atu familia sira ba vizita Sebastião Gomes nia kampa karik, ema seluk labele sama rate sira be satan netik dalan ne’e.
“Agora rate ne’ebá, ami ko’alia ona ho familia dala ida atu loke dalan husi kapela kotuk ba saudozu Sebastião Gomes nia kampa. Família sira tenke konkorda para loke fali dalan sira-ne’e no Governu mós sei haloot fali matebian sira-nia ruin ne’ebé kee sai ne’e ho fignu,” nia dehan
Familia balun konkorda no balun la konkorda, maibé nia fiar loron ida sei konkorda katak ne’e di’ak-liu halo tiha rate foun ida tau fali sira-nia ruin, nune’e ema labele sama tan sira-nia rate.
Notísia Relevante: Empreza Bobolait hein familia muda rate iha semitériu Santa Crúz
Jornalista : Jesuína Xavier
Editór : Cancio Ximenes
