DILI, 04 novembru 2024 (TATOLI)–Governu liuhusi Ministériu Juventude, Desportu, Arte no Kultura (MJDAC) aloka osan hamutuk rihun $100 ba atividade komemorasaun loron nasionál juventude ne’ebé selebra kada tinan iha 12 novembru, ho tema “Orgullu ho Ita-Nia Istória no Hamutuk Dezenvolve Ita-Nia Nasaun ida Prosperu iha Futuru”.
Notísia Relevante: MJDAK aloka rihun $100 hodi komemora loron Nasionál Juventude no Masakre Santa Cruz
Prezidente Conselho Nasionál Juventude Timor-Leste (CNJTL), Maria Dadi Soares Magno, hateten osan sira-ne’e sei gasta ba iha atividade feira nasionál juventude, kompetisaun, diskursu públiku, kompetisaun Drum Band, atividade La’o ain, vizita relijioza, semináriu Nasionál juventude no Talk Show hodi komemora loron nasionál Juventude.
“Osan sira-ne’e aloka ba iha atividade hahú 27 no 28 outubru hanesan halo reflesaun no misa agradesimentu osan liu $38 mil ba organizasaun responsável ba eventu. Osan liu rihun $40 mak aloka ba sentru juventude sira iha munisipiu hodi komemora loron nasionál juventude,” Prezidente Conselho Nasionál Juventude Timor-Leste (CNJTL) ne’e hateten ba jornalista sira liuhusi konferénsia imprensa, iha Faról.
Nia hateten, hahú iha segunda (04 novembru) ne’e atividade la’o ain husi munisipiu Lautém ne’ebé sei to’o iha Dili iha loron 12 novembru 2024.
Timor-Leste iha rekoñesimentu ne’bé rekoñese katak foinsa’e sira-nia kontribuisaun ba iha luta libertasaun pátria, tanba ne’e sei selebra ho atividade sira-ne’e.
“Ita hatene katak Estadu Repúblika Demokrátika Timor-Leste rekoese katak partisipasaun juventude liuhusi sakrifisiu no dedikasaun, abnegasaun no vida ne’ebé mak kontribui ba iha luta libertasaun Timor-Leste sai nasaun livre no independensia no soberanu. Hahú husi 12 outubru 1989, 28 outubru 1991 no 12 novembru 1991 to’o pontu kulminante referendu, Estadu rekoñese 12 Novembru hanesan loron nasionál Juventude,” nia dehan.
Iha sesta (08 novembru) ne’e halo abertura ba atividade selebrasaun iha Ministériu Juventude, Desposrtu, Arte no Kultura (MJDAC) sigla portugés), iha sábadu (09 novembru) iha atividade sertame, iha domingu (10 novembru) iha atividade diskursu públiku iha iha lian inglés, iha segunda (11 novembru) iha reflesaun no vizita relijioza no iha tersa (12 novembru) ne’e enseramente ho feira nasionál no kompetisaun drum band.
Nia hateten, hahú tersa (05 novembru) aban ne’e iha guia vizita ho estudante sira kona-ba istória saudozu Sebastião Gomes no Max Sthall kona-ba akontesimente masakre Santa Crús hamutuk ho estudante sira.
Eventu ne’e sei oragniza husi organizasaun sira hanesan Alumni Juventude Foinsa’e Parlamentu, Juventude Hadomi Natureza, CNJTL Aliansa Nasionál Kontrola Tabaku hodi responsável ba atividade sira, Uniaun Nasionál Eskuteriu Timor-Leste, Asosiasaun Ema Defisiénsia Timor-Leste no Cruz Vermelha Timor-Leste.
Jornalista : Jesuína Xavier
Editór : Cancio Ximenes
