BOBONARO,04 novembru 2024 (TATOLI) – Ministériu Edukasaun (ME) liuhusi Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lemos, segunda ne’e abertura formasaun espesializada ba administrasaun no jestaun eskolár ba dirijente eskolár foun na’in-196 iha munisípiu Bobonaro ne’ebé fasilita husi Institutu Nasionál Formasaun Dosente no Profesionál Edukasaun (INFORDEPE).
Formasaun ne’e nu’udar formasaun datoluk hafoin konklui iha munisípiu Aileu no Rejiaun Administrativu Espsiál Oe-Cuse Ambeno (RAEOA) ho
Objetivu jerál maka reforsa kompeténsia dirijente eskolár foun sira nune’e bele halo jestaun ho efisiente no efikaz iha eskola sira, no aumenta dirijente sira-nia koñesimentu espesífiku nune’e bele kompete iha área atuasaun sira.
Notísia relevante: INFORDEPE planeia oferese formasaun indusaun ba profesór kolokadu
“Ita agradese ba INFORDEPE tanba iha planu ne’ebé adekuadu tebes, iha tinan ida-ne’e ba nível territóriu tomak iha formasaun no kapasitasaun ba lideransa sira atu hasa’e sira-nia koñesimentu atu lidera instituisaun, atu sai líder ne’ebé di’ak, lideransa ne’ebé bele rezolve problema iha eskola no neutraliza situasaun sira hotu iha eskola,” Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lemos, hateten iha nia intervensaun ba programa ne’ebé realiza iha Jináziu Maliana.
Governante ne’e apela ba dirijente sira atu aproveita didi’ak oportunidade ne’e no espera katak liuhusi formasaun hirak-ne’e iha mandatu IX Governu Konstitusionál bele lori mudansa ruma iha edukasaun Timor.
“Atu nune’e ita bele transforma, lori ita-nia oan sira, muda sira-nia mentalidade husi lahatene ba hatene nune’e lori ida sira bele lori fali rai ida-ne’e ba oin,” nia akresenta.
Prezidente INFORDEPE, Domingos Martins, reforsa módulu hitu ne’ebé sai hanesan matéria prinsipál iha formasaun referida mak hanesan; jestaun administrasaun eskolár, lideransa eskolár, jestaun finanseira, lejizlasaun, teknolojia, informasaun no komunikasaun, kurríkulu edukasaun no fratenidade umana.
Formasaun ne’e hala’o durante oras 120, ne’ebé fahe ba parte tolu (3) mak hanesan; oras 48 ba formasaun prezensiál, orad 36 ba traballu autónomu no óras 36 ba avaliasaun.
“Ninia objetivu prinsipál mak atu kapasita líder eskola sira, ho nune’e bele jere eskola, tanba líder sira ho profesór sira mak sai hanesan ajente mudansa ba sistema edukativu iha Timor-Leste,” Prezidente INFORDEPE afirma.
Biban ne’e, Sekretáriu Autoridade Munisípiu Bobonaro ba Asuntu Administrasaun no Finansa, Domingos da Costa, agradese ba INFORDEPE no konsidera ho formasaun ne’e bele dezenvolve edukasaun iha nunisípiu Bobonaro.
“Halo ema profesionál iha ninia servisu ne’e la’ós nia abilitasaun literária, maibé liuhusi esperiénsia, ninia esperiénsia ne’e hetan husi servisu ne’ebé nia halo loron-loron no mós formasaun,” nia katak.
Tuir planu formasaun ne’e sei realiza mós iha mnisípiu hotu-hotu to’o tinan 2025.
Notísia relevante: INFORDEPE fó formasaun lian portugés ba profesór 30 husi Ensinu Sekundáriu
Jornalista: Sérgio da Cruz
Editór: Evaristo Soares Martins
