COVALIMA, 04 Novembru 2024 (TATOLI) – Komandu Polísia Nasionál Timor-Leste (PNTL) Covalima rejista kazu ofensa integridade fízika simples rua husi postu Suai, Munisípiu Covalima, durante selebrasaun loron finadu.
Komandante PNTL Covalima, Superintendente Polísia Calisto Gonzaga relata kazu ofensa integridade fízika simples ne’e akontese iha semitériu públiku Mata Air, iha suku Debos no iha semitériu Camnasa, iha postu Suai.
“Ita rejista kazu ofensa integridade fízika simples tanba maun-alin mak baku malu, tanba de’it hemu tua. Laiha asaun grave hodi rejista kazu grave hanesan omisídiu no laiha impedimentu, tanba sidadaun sira husi postu hitu movimentu ho livre”, Calisto Gonzaga dehan iha Santa Rosa, ohin.
Tanba ne’e, parte polísia nafatin fó hanoin ba sidadaun-sira bainhira hemu tua presiza kuidadu no sukat, nune’e haree família labele sai fali inimigu hodi baku malu no hamosu asaun kontra sidadaun nia Liberdade.
Hafoin selebrasaun finadu iha loron 02 Novembru, iha loron tuirmai, PNTL kontinua akompaña sidadaun sira ne’ebé viajen husi Suai bá Dili no la iha dezastre no akontese tan kazu ruma.
Notísia relevante: PNTL Covalima bandu sidadaun hemu tua iha semitériu públiku
Jornalista: Celestina Teles
Editora: Maria Auxiliadora
