DILI, 05 novembru 2024 (TATOLI)–Reitór re-eleitu Universidade da Paz (UNPAZ), Adolmando Soares Amaral, informa, estudante ba klase internasionál hahú ona orientasaun iha Índia.
“Kona-ba kooperasaun loke klase internasionál ne’e ami enkontru ona ho Ministru Ensinu Superiór no estudante sira halo hela orientasaun iha Índia, hein atu mai de’it,” Ministru hato’o hafoin serimónia tomada pose Reitór, iha salaun UNPAZ, Manleuana, tersa ne’e.
Reitór espera tinan ne’e bele implementa ona programa klase internasionál tanba fasilidade sira iha ona dalan.
“Ami espera iha outubru bele realiza ona maibé tanba de’it ema ne’ebé mak investe ne’e seidauk rejistu, entaun sira labele haruka osan ho montante boot mai, sira tenke liuhusi fali universidade maibé burokrasia naruk, tanba ne’e halo implementasaun tarde maibé ami garante tinan ne’e loke ona klase internasionál tanba sasán sira iha ona kontainer laran no bainhira to’o ona mak tékniku sira instala nune’e prosesu ensinu aprendizajen bele hahú la’o,” nia akresenta.
Notísia relevante : MESSK prefere UNPAZ-UCT haree uluk rekursu umanu molok loke klase internasionál
Daudaun ne’e parte administrasaun rejista ona estudante hamutuk 300 husi Índia no Filipina inklui timoroan na’in-10.
“Iha Timor mós ema barak mak tuir teste maibé na’in-10 mak liu,” Reitór tenik.
Dosente hamutuk 50 husi Índia no UNPAZ rasik mak sei hanorin iha klase internasionál ne’e.
“Sira sei mai hela iha otél no daudaun ne’e ami prepara hela sala aprendizajen ho padraun internasionál, ho kondisaun sira-ne’e ami laiha problema, estudante sira sei selu tuir tarifa ne’ebé mak ita aplika, tanba klase ne’e internasionál entaun presu mós internasionál, tanba ema husi nasaun seluk mak mai eskola iha ne’e. Tanba ne’e propina mós tuir internasionál inklui fasilidade sira,” nia katak.
Jornalista : Osória Marques
Editora : Julia Chatarina
