DILI, 05 novembru 2024 (TATOLI)—Prezidente Komisaun D trata asuntu Ekonomia no Dezenvolvimentu iha Parlamentu Nasionál (PN), Ricardo Baptista, kontinua husu Ministériu Agrikultura, Peska no Floresta (MAPPF) atu tau prioridade iha Orsamentu Jerál Estadu (OJE) 2025 hodi sosa tratór foun no hadi’a irrigasaun iha territóriu, atu apoiu agrikultór sira aumenta produsaun rai-laran.
Notísia Relevante: OJE 2025: MAPPF sei sosa “hand tractor” 300 no mákina kuda hare
“Iha territóriu, fatin barak rai poténsia presiza tebes Governu nia atensaun atu bele halo natar no toos. Hein katak, tinan oin bele tau osan hodi sosa tratór no hadi’a irrigasaun sira oinsá la’o di’ak hodi fornese bee ba natar sira,” Prezidente Komisaun D ne’e hateten ba jornalista sira iha resintu PN, tersa ne’e.
Tanba, nia dehan, iha fiskalizasaun komisaun nian identifika tratór sira-ne’ebé MAPPF distribui ba munisípiu sira atu atende agrikultór sira hodi fila rai halo toos no natar ne’e, tratór balun kondisaun ladi’ak ona.
Ezemplu, nia hateten, tratór sira iha munisípiu Manufahi ne’e balun aat tanba tratór ne’e para tempu naruk ona no ninia manutensaun presiza kustu boot, entaun trator balun hanoin atu halo lelaun ona.
Preokupasaun seluk, tuir nia, ba kombustível ba tratór sira-ne’e ladún iha entaun difikulta atendimentu ba agrikultór sira atu fila rai no halai natar.
Nia dehan, kada tinan MAPPF sempre tau orsamentu atu halo manutensaun no foin daudaun iha MAPPF halo hela akizisaun ba tratór foun oinsá apoiu ba munisípiu sira hodi agrikultór sira bele utiliza.
Tinan ne’e, nia husu Ministériu Agrikultura, Peska no Floresta (MAPPF) mós atu kontinua tau orsamentu iha Orsamentu Jerál Estadu ba tinan 2025 nian ne’e atu sosa tratór foun.
“Ami tun ba fiskalizasaun, aleinde ita-nia tratór aat no irrigasaun mós problema. Maibé, tinan ne’e, iha ona atu halo tan hodi hadi’a irrigasaun kauza lima mak hanesan Maliana mós komesa la’o no tuir informasaun iha Baucau mós hanesan. Ba irrigasaun foun ne’ebé sira halo, MAPPF tau prioridade atu halo, nune’e fornese bee ba natar-na’in sira,” nia dehan
Komisaun D rekomenda ba Governu liuhi Ministériu Agrikultura, Peska no Floresta (MAPPF) atu iha OJE 2025 kontinua tau prioridade ba tratór, hadi’a irrigasaun iha territóriu hodi agrikultór sira aumenta produsaun.
Jornalista : Nelson de Sousa
Editór : Cancio Ximenes
