DILI, 05 novembru 2024 (TATOLI)–Ministériu Edukasaun (ME) hamutuk ho Organizasaun Ministériu Edukasaun Sudeste Aziátiku (SEAMEO, sigla inglés) oferese formasaun durante semana ida, ba profesór hamutuk 20 ne’ebé hanorin lian inglés iha Eskola Ensinu Báziku, Ensinu Sekundáriu Jerál no Ensinu Sekundáriu Tékniku Vokasionál.
“Objetivu husi formasaun ne’e atu kapasita no hakle’an liután nia profesór sira-ne’ebé mak hanorin disiplina inglés iha Ensinu Báziku 3⁰ siklu, Ensinu Sekundáriu, inklui Ensinu Tékniku Vokasionál atu oinsá mak bele aumenta sira-nia abilidade iha lian inglés, liu-liu hasa’e sira-nia koñesimentu iha metodolojia hanorin atu aumenta koñesimentu iha pedagójiku atubele hanorin labarik sira,” Diretora Jerál Planu Polítika Inkluzaun no Informátika iha ME, Odelia das Dores Martins, hateten iha ámbitu abertura formasaun, iha ETDA, Fatuhada, tersa ne’e.
Formasaun ne’e realiza ba dahuluk iha Timor-Leste, ne’ebé antes ne’e Timor-Leste iha ona kolaborasaun ho SEAMEO iha Singapura hodi hahú loke turma dahuluk iha tinan 2024 no turma sira tuir mai sei loke iha tinan 2025.
“Formandu sira iha posibilidade tuir formasaun iha Singapura. Ita organiza formasaun ida-ne’e iha kapitál Dili maibé envolve profesór sira hotu husi munisípiu, maibé tanba fatin limitadu no profesór sira-nia disponibilidade la hanesan, entaun iha biban ida-ne’e formasaun inisiál partisipa husi profesór sira husi munisípiu hitu hanesan Dili, Aileu, Manatuto, Bobonaro, Manufahi, Baucau no Lautém, enkuantu munisípiu sira seluk ne’ebé seidauk tuir ne’e sei hein faze tuir mai,” nia akresenta.
Notísia relevante : ME abertura formasaun espesializada bá dirijente eskola sira iha Bobonaro
Biban ne’e, Diretora Jerál husu ba formandu sira atu aproveita didi’ak oportunidade ne’e.
“Uza oportunidade ho di’ak, talvez ida-ne’e faze primeiru ba ita-boot sira iha formasaun lian inglés. Prosesu aprendizajen ne’e hanesan esperiénsia foun ida atu hetan buat foun, tanba ne’e mak imi sira ne’ebé partisipa bele fahe esperiénsia ba malu. Husu atu partisipa másimu iha formasaun sira hanesan ne’e tanba hafoin formasaun ne’e manorin sira ne’ebé mak partisipa sei hetan sertifikadu, maibé sertifikadu ne’e só ba sira ne’ebé mak partisipa iha aula ne’e mínimu 80%,” nia informa.
Iha sorin seluk, Reprezentante formandu, Augusta Coemali, agradese ba oportunidade ida-ne’e tanba bele hetan oportunidade hasa’e kapasidade.
“Ha’u sente kontente tebes bele hetan oportunidade hanesan ne’e, tanba ema husi estranjeiru mak fó formasaun ba manorin sira, liu-liu ba manorin matéria inglés. Iha formasaun ida-ne’e ami apreende metodolojia oinsá mak atu hanorin ami-nia alunu sira iha aula laran, gramátika, vokabuláriu no oinsá mak hanorin labarik sira-nia skill speaking, writing, listening no seluk tan,” nia katak.
Jornalista : Osória Marques
Editora : Julia Chatarina
