DILI, 05 novembru 2024 (TATOLI)–Ministru Ensinu Superiór Siénsia no Kultura (MESSK), José Honório da Costa Pereira Jerónimo, husu ba Reitór Universidade da Paz (UNPAZ) re-eleitu, Adolmando Soares Amaral hodi serbisu ho responbilidade hodi hadi’a no lori instituisaun ba oin.
“Ha’u hakarak fó felisitasaun dala-ida tan ba Adolmando Soares Amaral ne’ebé ohin simu pose filafali hanesan Reitór UNPAZ nian, ho todan iha kabás no responsabilidade hodi hadi’a no lori instituisaun ne’e ba oin. Aproveita mós biban ida-ne’e atu apela mós katak UNPAZ bele kontinua iha kooperasaun di’ak ho Ministériu Ensinu Superiór, Siénsia no Kultura atu hamutuk ita bele kontinua kontribui ba dezenvolvimentu iha ensinu superiór,” Ministru hateten hafoin fó pose ba Reitór foun, iha salaun UNPAZ, Manleuana, tersa ne’e.
Ministru dehan, ensinu superiór iha Timor-Leste presiza Reitór sira ne’ebé mak sai hanesan líder akadémiku no sosiál.
“Reitór sira ne’ebé mak fó inspirasaun ba joven sira iha universidade no buka hakle’an tan sira-nia koñesimentu, buka atu harii sidadania ida rasik no adapta ba mudansa foun sira. Reitór ne’ebé mak aposta ba kualidade no sai parseiru iha ita-nia sosiedade, ne’e hanesan Governu nia luta ida,” nia akresenta.
Notísia relevante : Adolmando Soares Amaral re-eleitu nu’udar Reitór UNPAZ ba períodu 2024-2029
Governante ne’e fó hanoin, daudaun ne’e moris iha momentu importante ida, ne’ebé institusaun ensinu públiku no privadu sira hala’o knaar fundamentál iha kapasitasaun rekursu umanu sira. Futuru Timor-Leste depende ba formasaun husi jerasaun foin-sae sira ne’ebé sai hanesan motor ba dezenvolvimentu nasaun.
“Universidade da Paz nu’udar institusaun privadu halo papel importante iha prosesu ida-ne’e atu komplementa esforsu nasionál atu oferese edukasaun ne’ebé ho kualidade di’ak no orientadu ba kresimentu pesoál no profisionál husi sidadaun Timor-Leste nian,” nia fó atensaun.
Ministru nota, setór públiku mesak labele hatán ba nesesidade tomak iha área formasaun, nune’e institusaun privadu sira iha funsaun estratéjiku hodi kontribui ba diversifikasaun husi oferta edukativa no iha knaar ativu ida iha dezenvolvimentu kompeténsia no talentu ne’ebé Timor nia merkadu serbisu presiza.
“Importante tebes atu fó prioridade atu hadi’a kualidade formasaun ne’ebé fornese ba estudante sira. Ita hatene katak agora mundu iha mudansa barak loron-loron, no atu prepara ita-nia foin-sae sira ba dezafiu iha futuru, importante tebes katak formasaun tenke forte, luan no kualidade a’as liu,” nia tenik.
Governu iha kompromisu atu kontinua fó apoiu ba inisiativa sira neʼebé buka atu hadi’a kualidade ensinu inklui programa kapasitasaun ba profesór sira, modernizasaun husi laboratóriu sira no promove peskiza no inovasaun.
Aleinde ne’e, reforsu ba kapasitasaun dosente sira-nian no peskiza siéntifiku mak sai hanesan xave atu hasa’e kualidade iha ensinu superiór.
“Maibé misaun ida-ne’e sei susesu de’it bainhira Governu iha parseria di’ak ho institusaun privadu sira, ne’ebé kontinua atu investe iha kualifikasaun dosente sira, atualizasaun sira-nia kurríkulu no harii espasu ka ambiente aprendizajen adekuadu atu prepara foin-sae ho kualidade a’as.
Governu nia vizāun mak atu harii sistema ensinu ida ne’ebé inkluzivu, modérnu no orientadu ba nesesidade real husi nasaun ida-ne’e.
“Atu atinje meta ne’e presiza kooperasaun forte no kontinua entre Governu no institusaun ensinu superior públiku no privadu sira, ne’ebé tenke iha kompromisu hamutuk atu asegura dezenvolvimentu di’ak no sustentável nasaun,” Ministru hameno.
Iha biban hanesan, Prezidente Konsellu Administrasaun Fundasaun Neon Metin, José Menezes, hateten, konfiansa ne’ebé fundasaun sira oferese ba Reitór foun ne’e tenke simu ho responbilidade hodi lidera UNPAZ ne’e ba tinan-lima ho di’ak.
“Parabéns ba Reitor tanba hetan tan konfiansa lidera Universidade da Paz ba tinan-lima mai. Konfiasa deposita ba ita, tanba depois tinan-lima iha ita-nia lideransa iha progresu di’ak. Ita investe ita-nia tempu, enerjia no dedikasaun tomak ba Universidade, husi segunda to’o sábadu, ita sempre akompaña lala’ok tomak iha ne’e. Dalaruma mós tenke atende asuntu sira seluk iha kalan boot bainhira akontese disturbu ruma iha universidade. Dedikasaun ida ne’e merese duni hetan konfiansa no apresiasaun,” nia fó hanoin.
Fundasaun deside re-eleitu tanba haree serbisu durante ne’e iha progresu ne’ebé di’ak tebes.
“Iha ita-nia mandatu mós la’o ho di’ak. Tinan-lima ita hala’o de’it iha kampus, tanba razaun balun, maibé rezultadu KKN ka serbisu sosiál tinan-lima tutuir malu mak morru hale’u universidade ne’e, paving no parrajen, morru haleu kampus Liquiçá, kampu futsal no lutu oin ne’ebá ne’e, mobiliza estudante KKN ba iha Oé-cusse, mosu dezentendimentu balun iha ne’ebá maibé buat hotu la’o ho di’ak. Parabéns dala-ida tan, ba progresu sira ne’e,” nia dehan.
Reitór re-eleitu UNPAZ, Adolmando Soares Amaral, agradese ba konfiansa tomak, tinan-lima mai ne’e sei konsentra de’it ba iha peskiza no publikasaun, inklui esforsu atu fakuldade no departamentu sira hetan valór di’ak liután husi Ajensia Nasionál Avaliasaun no Akreditasaun Akadémika, Institutu Públiku (ANAAA, I.P.).
“Ami aloka rihun $200 ba programa peskiza de’it no publikasaun. Ami hanoin mandatu tinan-lima atu tulun Governu no Estadu atu rekomenda buat balun. Atu rekomenda mak ami presiza halo peskiza no organiza semináriu sira nune’e sira bele konsidera rezultadu peskiza husi publikasaun presiza depois lori ba planu Governu no halo polítika nune’e bele hatán ba ida-ne’e. Husi departamentu sira hotu ami hetan valór husi ANAAA ne’e B, maibé tinan-lima mai ami tenta para hetan hotu valór A,” nia dehan.
Jornalista : Osória Marques
Editora : Julia Chatarina
