DILI, 05 novembru 2024 (TATOLI)—Ministériu Ensinu Superiór Siénsia no Kultura (MESSK) nia taxa ezekusaun orsamentu ba tinan 2024 atinje ona 89,9%.
“Ezekusaun ne’e ba transferénsia públika millaun $5 hodi ajuda universidade sira inklui atividade asesu ingresu nian ne’ebé la’o hela. Ida-ne’e ita aloka uluk 40% depois daruak mak 60%, maibé ba hotu ona,” Ministériu Ensinu Superiór, Siénsia no Kultura, José Honório da Costa Pereira Jerónimo, informa ba Agência Tatoli, hafoin partisipa tomada pose ba Reitór foun Universidade da Paz (UNPAZ), iha Manleuana, tersa ne’e.
Taxa ezekusaun husi fulan-janeiru to’o outubru 2024 ho totál $9.132.072, ho nia predisaun estimativa to’o loron 31 dezembru bele ezekuta to’o 97%.
Notísia relevante : MF aprezenta ezekusaun OJE 2024 atinje 63% ba PN
Orsamentu tinan 2024 ba MESSK hamutuk millaun $9,1 aloka ba subvensaun públika millaun $5 sei destina atu transfere ba instituisaun ensinu superiór privadu sira.
Iha planu orsamentu 2025 nian ministériu sei halo redusaun orsamentu tanba sei tau prioridade ba programa tolu ne’ebé sei implementa iha tinan oin ho montante orsamentu millaun $6,9.
“Prioridade apostadu no previstu ba tinan oin mak kontinua apoiu subvensaun públika ba ensinu superiór privadu sira, planu harii eskola doutorál ida no prioridade datoluk mak planu atu harii Instituisaun Politékniku ida iha Lospalos munisipiu Lautém, iha área Turizmu no Otelária,” nia akresenta.
Aleinde ne’e, atu asegura no kontinua konstrusaun edifísiu Instituisaun Politékniku Betano, nune’e ministériu mós halo ona prosesu konkursu ba faze foun ne’ebé mak tama ona ba faze konstrusaun edifísiu, hafoin faze ba konstrusaun landscape ne’ebé mak previstu ona atu finaliza iha períodu tinan ida-ne’e.
Programa importante seluk ne’ebé mak sei atinje iha tinan ida-ne’e mak hanesan implementasuan sistema baze dadus dijitál ne’ebé mak atualmente kobre ona ba dadus husi instituisaun ensinu superiór hamutuk 19.
Tuir planu iha tempu besik sei lansa ba públiku atu nune’e Timor-Leste bele iha ona sistema baze dadus dijitál ne’ebé mak bele garantia kualidade dadus ensinu superiór.
Jornalista : Osória Marques
Editora : Julia Chatarina
