COVALIMA, 05 Novembru 2024 (TATOLI) – Ministériu Juventude Desportu, Arte no Kultura (MJDAK) apoia $4.700 ba Sentru Juventude Covalima (CJC) hodi selebra Loron Nasionál Juventude (12 Novembru 1991-12 Novembru 2024), ne’ebé marka mós data Masakre Santa Krús.
Diretór-Ezekutivu CJC, Júlio Ferreira, hateten tema nasionál ba Loron Juventude mak “Orgullu ho Ita-Nia Istória no Hamutuk Dezenvolve Ita-Nia Nasaun ida Prosperu iha Futuru”.
“Sentru Juventude Covalima (CJC) organiza atividade komemora Loron Nasionál 12 Novembru bazeia ba tor ne’ebé ita-nia Ministériu Juventude Desportu, Arte no Kultura fó”, Júlio Ferreira dehan iha Kampung Baru, ohin.
Tanba ne’e, CJC nia preparasaun ba komemorasaun loron nasionál mak organiza atividade sira hanesan halo limpeza jerál, semináriu, kalan reflesaun ho loke filme Masakre 12 Novembru no husu misa agradesimentu.
Orsamentu ne’ebé Governu disponibiliza ne’e aloka $4.200 ba postu administrativu Fatululik, Fatumea, Fohorem, Tilomar, Maucatar, Suai no Zumalai, ne’ebé kada postu hetan $600 no prevee $500 ba halo monitorizasaun ba atividade 12 Novembru nian.
Bazeia ba orientasaun MJDAK, Loron Nasionál Juventude Loriku Asu’ain kumu liman ho lian-ida, asaun ida, ho aten-brani husi Igreja Motael halo marsa bá semitériu Santa Krús ho unidade hakarak luta ba ukun rasik-aan.
“Ukun rasik aan ne’ebé sosa kotu ho sakrifísiu, ho ruin no raan, terus no susar iha liman kroat Indonézia nia kbi’it no ukun internasionál nian. Iha loron no tempu ne’ebá foinsa’e timoroan, feto no mane, iha vizaun ida, hakarak ida ho espiritu nasionalizmu no patriotizmu oferese aan ba objetivu hamutuk ida-de’it atu liberta territóriu nasionál hosi ukun rai seluk ka ema seluk”, dehan.
Tabna ne’e, Estadu Timor-Leste, liuhusi Parlamentu Nasionál aprova ona lei númeru 10/2005 hodi konsidera 12 Novembru hanesan loron feriadu nasionál. Lei ne’e fó biban ba juventude rezisténsia no jerasaun futuru hodi fó tempu komemora loron istóriku no manifesta potensialidade juventude liuhusi atividade ne’ebé bele promove kriatividade joven iha grupu no pesoál.
Notísia relevante: Loron Nasionál Juventude: “Orgullu ho ita-nia istória no hamutuk dezenvolve ita-nia nasaun”
Jornalista: Celestina Teles
Editora: Maria Auxiliadora
