OÉ-CUSSE, 05 Novembru 2024 (TATOLI) – Xefe suku Costa, Francisco Colo, husu ba Servisu Água no Saneamentu (SAS) Rejiaun Administrativa Espesiál Oé-Cusse Ambeno (RAEOA) atu funsiona postu sanitáriu ne’ebé harii ona iha merkadu Numbei hodi utiliza ba nesesidade públika.
“Postu sanitáriu iha merkadu ne’e la loke tanba liga ho serbisu SAS nian. Bainhira loke ema barak sei tama no fatin ne’e sei sai fali lixu, entaun ladún di’ak tanba laiha ema atu kontrola no laiha bee-moos. Tan ne’e, ha’u husu ba SAS bele koloka pesoál ida atu jere, tanba iha merkadu, sintina públiku taka tinan barak ona”, Francisco Colo sujere.
Tuir líder komunitáriu, loloos autoridade funsiona postu ne’e tanba merkadu Numbei nu’udar sentru ba atividade négosiu iha Oé-Cusse.
Notísia relevante: Negosiante iha merkadu Numbei preokupa ho problema falta bee-moos
“Dalaruma ema mai merkadu, de repente presiza sintina karik bele asesu. Bainhira atu koloka ema mós presiza iha bee-moos, se la’e fatin ne’e sei sai fatin lixu ba merkadu ne’e rasik. SAS tenke haree ida-ne’e”, nia husu.
Jestór Merkadu Numbei, Fernando de Sousa Neka, dehan postu sanitáriu ne’e harii kedas iha 2012 no iha 2022 autoridade reabilita tan, maibé to’o agora seidauk utiliza, maske instala ona ahi no ekipamentu seluk.
“Razaun tanba Governu tenke koloka pesoál ida atu hein hodi hamoos no fó seguransa bainhira komunidade uza. Kuandu ami loke sé mak atu hein no hamoos fatin ne’e? Asuntu ne’e ha’u rekomenda beibeik ba Governu, maibé to’o agora seidauk tau-matan ba uma ne’e, entaun fatin ne’e abandona, maske reabilita ona”, nia dehan.
Notísia relevante: SAS Oé-Cusse instala bee-moos ba komersiante merkadu Numbei
Hatán ba preokupasaun sira-ne’e, Xefe Departementu SAS Oé-Cusse, José Ili, informa katak parte SAS sei koordena ho autoridade lokál sira hodi koloka pesoál ida atu jere.
“Foin daudaun ami ko’alia ona ho responsavel merkadu, maibé rejeita atu jere postu ne’e tanba serbisu ho voluntáriu. Tan ne’e, ami sei esforsu atu koloka pesoál ida husi SAS ou bele husu ba xefe aldeia atu delega hela pesoál ida atu jere, bainhira negosiante sira uza sei kontribui hahú husi sentavu $0,10 to’o $0,25”, nia adianta.
Jornalista: Abílio Elo Nini
Editora: Maria Auxiliadora
