DILI, 05 novembru 2024 (TATOLI)–Organizasaun Ministériu Edukasaun Sudeste Aziátiku (SEAMEO, sigla inglés) halo kooperasaun ho Ministériu Edukasaun (ME) hodi fó apoiu ba programa pilar tolu.
“Ohin enkontru kortezia ida ho Konsellu Britániku sira ne’ebé mak hola parte iha organizasaun Ministériu Edukasaun Sudeste Aziátiku, sira hakarak fó apoiu ba Ministériu Edukasaun iha Timor-Leste liuhusi programa pilar tolu,” Ministra Edukasaun, Dulce de Jesus Soares, hateten, iha salaun ME, Vila-Verde, tersa ne’e.
Programa pilar tolu mak hanesan, dahuluk atu reforsa filafali literasia no numerasia ba estudante sira, liu-liu ba eskola sira iha nível ensinu báziku, daruak atu asesu ba labarik feto sira ne’ebé mak karik drop out, sira la kontinua sira-nia estudu ho razaun barak, entaun la kontinua, no datoluk haree ba labarik no joven feto sira-nia asesu ba serbisu menus tanba sira falta koñesimentu iha área dijitalizasaun.
“Iha estudu ne’e sira sei haree katak dalaruma feto nia dezempeñu iha área ne’ebé sira eskolla ne’e menus, entaun programa ida-ne’e sei haree hotu ba asuntu sira-ne’e, tanba ne’e importante atu ita implementa,” nia akresenta.
Notísia relevante : SEAMEO introdús uzu teknolojia edukasaun iha Timor-Leste
Ministra afirma, programa pilar tolu ne’e la’ós ba de’it ensinu báziku maibé ba joven sira hotu.
“Ida-ne’e Ministériu Edukasaun ninia kooperasaun dahuluk ho Konsellu Britániku. Ministériu haruka ona proposta ida hahú ohin, aban no bainrua sei iha workshop hamutuk ho Dirijente Ministériu Edukasaun nian iha área relevante atu haree ba proposta ne’e depois tama iha akordu ida, katak konkorda duni atu serbisu hamutuk iha programa ida-ne’e,” nia katak.
Parseiru barak mak interrese ho asuntu literasia no numerasia tanba asuntu ne’e nafatin sai dezafiu.
“Ida-ne’e di’ak tebes, maski iha parseiru barak tiha ona mak tau-matan ba asuntu ne’e, literasia no numerasia sai nafatin problema ida iha Timor-Leste inklui nasaun barak enfrenta situasaun ida-ne’e,” governante ne’e tenik.
Serbisu ne’e halo ona iha Kambódia, Laos no Timor-Leste, nune’e sei iha agrupamentu iha nasaun tolu ne’e mak atu estuda hamutuk atu haree maneira aplika hodi bele ajuda reforsa liután estudante sira-nia prosesu ensinu aprendizajen.
Iha tinan 2009 kedas hafoin Banku Mundiál halo estudu ida katak iha momentu ne’ebá nível literasia no numerasia iha mundu ne’e menus, nune’e halo filafali iha tinan 2017 hodi hatudu iha avansu oituan.
“Ita hakarak kontinua reforsa nafatin sira-nia nível literasia no numerasia, tanba ida-ne’e mak baze. Inan-aman mós barak mak ko’alia katak sira-nia oan bá eskola maibé seidauk hatene lee no hakerek, entaun Ministériu Edukasaun nu’udar responsável ba asuntu ida-ne’e nafatin buka dalan oinsá mak atu rezolve problema ida-ne’e, ho parseiru sira, la’ós Ministériu Edukasaun de’it maibé asuntu ida-ne’e ita mós serbisu hamutuk ho parseiru sira,” Ministra salienta.
Iha sorin seluk, Diretór Programme and Development, John Arnold Siena, konsidera, programa pilar tolu ne’e importante tebes atu implementa iha Edukasaun Timor-Leste tanba programa ida-ne’e di’ak tebes no bele ajuda edukasaun iha Timor-Leste atu sai di’ak liután.
“Ita sei implementa programa ne’e iha tempu badak no agradese ba Ministériu Edukasaun tanba bele hola parte iha programa pilar tolu ne’e hodi salva Edukasaun iha Timor-Leste ho di’ak liután,” nia otimista.
Jornalista : Osória Marques
Editora : Julia Chatarina
