COVALIMA, 06 Novembru 2024 (TATOLI) – Empreza Lifran Unipesoál Lda hatún ona materiál konstrusaun hodi hahú halo reabilitasaun ba antigu edifísiu Sekretaris Wilayah Daerah (Sekwilda) II, iha Administrasaun Munisípiu Covalima (AMC).
“Kompañia sira hatún materiál reabilitasaun edifísiu iha administrasaun munisipál nia sorin ne’e molok atu tama loron boot finadu. Reabilitasaun ne’e ita uza osan restu husi implementasaun projetu ualu”, Diretór Servisu Munisipál ba Planeamentu Integradu no Dezenvolvimentu (SMPID), Carlito Barros dos Reis, hateten ohin.
Dirijente ne’e salienta katak empreza hahú mobiliza materiál, tanba durasaun kontratu ba reabilitasaun fulan rua, husi Novembru no remata iha Dezembru 2024, bainhira la konsege remata estende to’o ba 15 Janeiru 2025.
Restu husi orsamentu ba implementasaun projetu ualu hamutuk rihun 100-resin, ne’ebé autoridade Covalima utiliza. Aleinde reabilita edifísiu, hadi’a mos iluminasaun iha edifísiu AMC oin, nomós fatin estasionamentu motorizada no karreta ba funsionáriu sira.
Lembra katak alokasaun orsamentu ba projetu ualu husi Programa Dezenvolvimentu Integradu Munisipál hamutuk millaun $1,3. Husi montante ne’e $1,2 ba kontrata empreza sira hodi halo ona projetu konstrusaun ne’ebé hahú serbisu iha Agostu tinan ne’e.
Notísia relevante: Covalima uza osan restu husi PDIM hodi reabilita antigu edifísiu sekwilda II
Jornalista: Celestina Teles
Editora: Maria Auxiliadora
