COVALIMA, 27 Setembru 2024 (TATOLI) – Autoridade Covalima sei utiliza osan restu rihun $145 husi projetu Planu Dezenvolvimentu Integradu (PDIM) hodi reabilita antigu edifísiu sekretaris wilayah daerah (sekwilda) II, nune’e funsionáriu sira bele utiliza hodi hala’o knaar ho di’ak iha fatin ne’e.
Prezidente Interinu Autoridade Covalima, Alberto Moniz de Araújo, hateten restu husi verba PDIM ne’e labele hatama fali ba kofre Estadu maka sei utiliza atu halo reabilitasaun ba edifísiu ne’e.
Lembra katak alokasaun orsamentu ba projetu ualu husi PDIM hamutuk millaun $1,3, husi montante ne’e $1,2 kontrata ona empreza sira hodi halo ona projetu konstrusaun.
“Orsamentu restu ne’ebé ita halo poupansa husi projetu PDIM ualu, ita labele fó fila ba kofre Estadu, maibé uza halo reabilitasaun ba edifísiu ho pakote ne’ebé kompletu ho ekipamentu ba funsionáriu sira hodi presta sira-nia serbisu ho di’ak”, Alberto Moniz de Araújo dehan ohin.
Alberto Moniz dehan kona-ba reabilitasaun antigu edifísiu sekwilda II ne’e hein de’it Diretór PDIM Covalima, Pedro de Araújo Gomes, aprezenta ba Ministériu Administrasaun Estatál no bainhira hetan aprovasaun bele hahú ona obra, tanba nia planta no kadernu enkargu (BoQ) preparadu.
Tuir baze legál Dekretu-lei númeru 84/2023, 23 Novembru, iha kinta alterasaun husi Dekretu-lei númeru 3/2016, 16 Marsu, Prezidente Autoridade Munisípiu iha kompeténsia atu halo ajudikasaun direta ba obra sira ne’ebé nia orsamentu ho montante rihun 500 mai kraik.
Iha fatin hanesan, Diretór PNDS Covalima, Pedro de Araújo Gomes, fó hanoin katak restu husi orsamentu projetu ualu ne’e di’ak liu utiliza hodi sosa kadeira no meza ba funsionãriu sira, tanba dauduan lato’o ba sira atu halo serbisu.
“Orsamentu poupansa rihun $145-resin husi projetu ualu atu halo reabilitasaun ba edifísiu, tuir loloos ita presiza klarifika item ne’ebé uza osan atu halo reabilitasaun ba edifísiu iha administrasaun munisípiu nia sorin”, dehan.
Iha sorin seluk, Diretór Servisu Munisipál ba Planeamentu Integradu no Dezenvolvimentu, Carlito Barros dos Reis, reforsa katak projetu PDIM ualu hahú implementa ona iha inísiu Agostu no sei finaliza iha Dezembru 2024. Daudaun ne’e projetu kontrusaun fízika iha terrenu atinje ona porsentu 19.
Notísia relevante: Implementa ona projetu PDIM Ualu Iha Covalima
Jornalista: Celestina Teles
Editora: Maria Auxiliadora
