COVALIMA, 24 Setembru 2024 (TATOLI) – Servisu Planu Dezenvolvimentu Integradu Munisipál (PDIM) iha Covalima implementa ona projetu konstrusaun ualu iha postu administrativu Suai, Maucatar, Fohorem no Zumalai.
Diretór PDIM, Carlito Barros dos Reis, informa katak implementasaun projetu ualu ne’e nia prosesu liuhusi konkursu públiku no empreza ualu mak sai manan-na’in ho kustu kontratu hamutuk millaun $1,2 husi totál verba alokada ba PDIM hamutuk millaun $1,3. Ba projetu sira ne’e halo ona pagamentu ba empreza hamutuk $309.412,55.
“Ita implementa projetu konstrusaun PDIM iha Agostu 2024. Daudaun ne’e, nia progresu serbisu husi projetu hitu foin atinje 19,1%, tanba implementasaun projetu rekonstrusaun jadín foho Lakirin foin mak halo prosesu kulturál”, Carlito dos Reis adianta, ohin.
Bazeia ba kontratu ho empreza sira, durasaun tempu atu implementa projetu PDIM ualu sei halo durante fulan lima, hahú iha Agostu no sei finaliza iha Dezembru 2024 ne’e.
Empreza ualu ne’ebé implementa projetu mak Savi Guju halo konstrusaun muru haleu edifísiu Obra Públika ho nia kustu kontratu $72.600, Mandarin halo konstrusaun ba salaun enkontru postu administrativu Fohorem ho kustu kontratu $116.397,52, Feto Lima harii eskola bázika filiál iha suku Matai, postu Maucatar ho nia verba kontratu $76.921,36, no Tofranditar harii Laboratóriu Sentru Saúde Komunitáriu Zumalai ho nia kustu kontratu $86.121,61.
Aleinde ne’e, empreza Queenzha Falov harii merkadu iha postu Suai ho kontratu $120.118,70, Bend Maha Male konstrui rezidénsia ba médiku iha suku Holpilat ho kontratu $413.144,25, Jino Linda harii kanál irrigasaun Bauraikun, iha aldeia Kulu-oan, Suku Tashilin ho kustu kontratu $167.420,90 no Taroman Lakfa halo rekonstrusaun jardín foho Lakirin iha suku Holpilat ho kustu kontratu $140.219.
Diretór Servisu Munisipál Obra Públika Covalima, Sidónio Gusmão, dehan katak empreza Sabi Guju mak halo ona konstrusaun ba muru protesaun iha edifísiu Obra Públika Covalima ne’ebé hahú implementa iha inísiu Agostu.
“Hafoin finaliza prosesu iha parte aprovizionamentu, kompañia Sabi Guju hahú halo konstrusaun ba muru haleu ne’ebé daudaun ne’e nia konstrusaun fízika tama ona porsentu 49”, nia realsa.
Notísia relevante: Autoridade Covalima sensibiliza matadalan ba elaborasaun PDIM
Jornalista: Celestina Teles
Editora: Maria Auxiliadora
