DILI, 06 novembru 2024 (TATOLI)—Komisaun F trata asuntu Saúde, Seguransa Sosiál no Igualdade Jéneru iha Parlamentu Nasionál (PN), liuhusi ninia relatóriu no paresér nakait ho proposta Orsamentu Jerál Estadu (OJE) 2025, hato’o rekomendasaun ba Ministériu Saúde (MS) atu hadi’a serbisu saúde iha Timor-Leste (TL).
Notísia Relevante: Proposta OJE 2025 : MS tau millaun $73 ba kategoria lima
“Rekomenda ba Ministériu Saúde (MS) atu halo pagamentu ba dívida ba ospitál sira iha rai-li’ur. Hamenus númeru pasiente transfere ba rai-li’ur liuhusi mellora serbisu saúde ne’ebé iha Timor-Leste,” Deputada Relatora, Aliança Conceição Araújo, halo leitura relatóriu no paréser setoriál husi komisaun permenante sira iha ámbitu debate proposta OJE 2025 iha faze jeneralidade iha sala plenária PN, kuarta ne’e.
Komisaun F mós rekomenda atu halo enkontru trimestrál entre MS ho Parlamentu Nasional hodi fó informasaun.
Rekomenda atu iha área saúde atu transformasaun sentru izolamentu iha Liquiça, Manatuto no Viqueque iha unidade kuidadu paliativu.
Rekomenda atu fó prioridade ba hasa’e kualidade laboratóriu nasionál saúde nian, hodi iha kontrolu ne’ebé efetivu ba produtu sira ne’ebé importa no konsume iha merkadu, hanesan produtu ai-hán sira.
Komisaun E rekomenda mós ba Ospitál Nasionál Guido Valadares (HNGV, siglá portugés), atu hadi’a servisu saúde nian, hodi promove konfiansa pasiente, família no sidadaun sira-nian iha servisu HNGV nian, liuhosi investimentu iha infraestrutura no formasaun kontínua ba profisionál saúde sira.
Rekomenda ba Institutu Nasionál Farmásia no Produtu Médiku, atu hadi’a sistema informátiku hodi garantia disponibilidade, kualidade no distribuisaun ai-moruk, reajente no fornesimentu sira, hodi hatán ba nesesidade populasaun nian.
Nune’e mós, rekomenda ba Institutu Nasionál Saúde Públika Timor-Leste nian, garante ezisténsia reajente sira iha laboratóriu toksikólojia nian, liuhosi akordu sira ho laboratóriu sira iha estranjeiru hodi fornese reajente sira, hodi konsidera risku transporte ho distánsia dook.
Jornalista : Nelson de Sousa
Editór : Cancio Ximenes
