OÉ-CUSSE, 06 Novembru 2024 (TATOLI) – Sekretaria Rejionál Edukasaun no Asuntu Sosiál, Rejiaun Administrativa Espesiál Oé-Cusse Ambeno (RAEOA), iha programa prioridade ne’ebé sei implementa iha 2025 mak kualifika rekursu umanu, liuliu disponibiliza formasaun ba manorin sira atu hasa’e kualidade edukasaun iha nivel Ensinu Pré-Eskolár (EPE), Ensinu Báziku (EB) to’o Sekundáriu sira.
“Ami-nia planu prinsipál ba 2025 mak hadi’a karáter profesór sira liuhusi formasaun ba kada eskola filiál, nune’e manorin sira tenke hatene konteúdu saida mak sira hanorin iha primeiru períodu, segundu no terseiru”, Sekretária Rejionál Edukasaun no Asuntu Sosiál Inácia Tamele hateten.
Aleinde ne’e, kria mós materiál didátiku tanba maioria eskola sira iha Oé-Cusse sei enfrenta problema falta saladeaula no profesór, tanba eskola loke barak entaun Servisu Edukasuan tenke buka meiu oinsá halo prosesu aprendizajen la’o ho efetivu.
Notísia relevante: INFORDEPE hasa’e koñesimentu manorin sira kona-ba literasia no numerasia
“Iha planu asaun anuál 2025, ami mós prevee infraestrutura ba eskola barak, maibé husi Komisaun Revizaun Orsamentu hamenus tiha balun, maibé husi ha’u-nia parte hamenus mós la problema, importante kapasitasaun ba profesór sira ne’e prioridade”, nia dehan.
Prioridade seluk mak tenke kontinua Programa Merenda Eskolár no Konsesaun Eskolár atu hadi’a nutrisaun ba estudante sira no hadi’a mós kondisaun eskola sira.
“Konsesaun tenke iha nafatin atu prepara materiál didátiku no merenda eskolár tenke iha atu hadi’a nutrisaun ba estudante sira. Sé estudante mai ho kabun mamuk, iha uma preparasaun ai-han ladún nutritivu, entaun impede mós prosesu aprendizajen. Dalabarak kuandu estudante hamlaha, nia konsentrasaun ladi’ak, entaun Governu tenke prepara ai-han natoon ba sira”, nia salienta.
Iha proposta Orsamentu Jerál Estadu (OJE) 2025 ba RAEOA, liuliu ba Sekretaria Rejionál Edukasaun no Asuntu Sosiál aloka ba iha transferénsia públika $1,531.248 ka okupa 20,55% ho objetivu atu fornese konsesaun eskolár no merenda eskolar ba Ensinu Báziku no Pré-Eskolár.
Nune’e mós iha programa edukasaun pré-eskolár aloka rihun $70 ka 0,27% ho objetivu atu mellora kondisaun eskola no garante prosesu aprendizajen nomós minimiza volume estudante. Orsamentu referidu atu halo konstrusaun ba edifísiu Ensinu Pré-eskolár Fatubena iha suku Usitako.
Kona-ba programa Ensinu BáZiku prevee rihun $180 ka okupa 0,69% atu halo konstrusaun no reabilitasaun ba iha eskola bázika filiál sira.
Notísia relevante: RAEOA prevee millaun $62 iha OJE 2025
Jornalista: Abílio Elo Nini
Editora: Maria Auxiliadora
