OÉ-CUSSE, 05 Novembru 2024 (TATOLI) – Institutu Formasaun Dosente no Profisionál Edukasaun (INFORDEPE) hasa’e koñesimentu profesór na’in-133 iha Oé-Cusse kona-ba literasia no numerasia.
Xefe Departementu Formasaun Pré-Eskolár no Ensinu Báziku iha INFORDEPE, Agostinho Sarmento Pinto, informa katak formandu sira ne’e mai husi ensinu báziku, kompostu husi primeiru siklu na’in-70, segundu 40 no terseiru 23.
“Formasaun hahú ohin to’o sabadu semana ne’e. Ba primeiru siklu kona-ba konteúdu literasia, segundu siklu kona-ba númerasia ka matemátika no terseiru siklu mak Competência para a Vida e para o Trabalho [CVT]”, Agustinho Pinto informa iha salaun Edukasaun Oé-Cusse, ohin.
Notísia relevante: INFORDEPE oferese manuál hodi apoia formasaun língua portugeza iha Oé-Cusse
Nia esplika katak numerasia persiza introdús ba manorin sira, tanba sai preokupasaun ba komunidade, tanba dalaruma alunu sira to’o uma sura númeru seidauk loos.
Nune’e mós ba terseiru siklu kona-ba CVT, tuir loloos INFORDEPE labele introdús konteúdu ne’e, tanba iha 2025 iha ona revizaun kurríkulu no dixiplina ne’e rasik sei la eziste ona, maibé nia konteúdu sei kontinua implementa iha dixplina seluk, entaun ho formasaun ne’e, manorin sira bele hakle’an sira-nia koñesimentu.
Notísia relevante: Manorin 85 iha RAEOA simu sertifikadu língua portugeza nivel B1 no B2
Sekretária Rejionál Edukasaun no Asuntu Sosiál, Inácia Tamele, esplika kona-ba realizasaun formasaun ne’e tanba iha kooperasaun entre Servisu Edukasaun Oé-Cusse no INFORDEPE, tanba RAEOA aposta iha kustu formasaun ba segunda siklu no materiál didátiku ba formasaun no INFORDEPE aposta ba formasaun primeiru no terseiru siklu.
“Tan ne’e, ha’u espera formadór sira fahe matenek ne’ebé ligasaun ho numerasia no literasia no CVT ba profesór sira, nune’e sira-bele implementa iha sira-nia eskola idak-idak. Tanba atu hadi’a kualidade edukasaun, profesór tenke hatene metodolojia prosesu aprendizajén no tenke hatene kompeténsia nu’udar manorin”, nia afirma.
Tuir nia, realidade ne’ebé akontese, durante ne’e ekipa Edukasuan avalia no observa preparasaun profesór ba prosesu ensinu-aprendizajen ladún másimu no manorin balun ladún hatene nia kna’ar no responsabilidade.
“Ha’u husu ba formadór sira atu hatudu sistema prosesu aprendizajen modernu ba profesór sira durante formasaun, tanba tuir métodu prosesu aprendizajen Kurríkulu Ensinu Báziku katak partisipativu no sentraliza prosesu aprendizajen iha estudante sira, tenke kria grupu diskusaun atu hadi’a jestaun klase no jere tempu”, nia salienta.
Notísia relevante: RAEOA lansa Sentru Formasaun Profesór nu’udar investimentu iha setór edukasaun
Formasaun hahú iha parte dadeer no kontinua to’o lorokraik ne’ebé realiza iha sentru formasaun profesór iha bairru Santa Rosa, iha suku Costa.
Jornalista: Abílio Elo Nini
Editora: Maria Auxiliadora
