DILI, 06 novembru 2024 (TATOLI)—Parlamentu Nasionál (PN) ho Governu, kuarta ne’e, hahú halo debate ba proposta-lei númeru 12/VI(2a) Orsamentu Jerál Estadu (OJE) ba 2025 ho montante billaun $2,6.
Notísia Relevante: https://tatoli.tl/2024/10/02/pn-konsidera-governu-kumpre-leo-submete-proposta-lei-oje-2025/
Tuir giaun ba diskusaun no votasaun iha jeneralidade hala’o durante loron tolu (3) ne’ebé hahú husi loron 06 to’o 08 novembru tinan 2024.
Primeiru-Ministru (PM), Kay Rala Xanana Gusmão, inísia aprezentasaun proposta-lei, tuir kedas aprezentasaun relatóriu no paresér husi komisaun C trata asuntu Finansa Públika ramata, kontinua ho intervensaun husi Deputadu sira no Governu tuir tempu ne’ebé fixa ona ne’ebé atribui ba bankada parlamentár sira no Governu.
Debate ne’e hahú iha tuku 09h00 dadeersan, loke ho hananu inu nasionál “Pátria! Pátria!”.
“Nune’e, ha’u fó kedas tempu ba sekretária meza atu halo kedas leitura ba giaun diskusaun no votasaun,” Prezidente Parlamentu Nasionál, Maria Fernanda Lay, hato’o iha abertura ba debate proposta OJE 2025
Tuir Rejimentu Parlamentu Nasionál (RPN) iha artigu 105.º (Inísiu diskusaun), iha númeru 1 hateten diskusaun iha jeneralidade foka ba prinsípiu no sistema projetu ka proposta lei idaidak nian.
Enkuantu, tuir ajenda iha 11-25 novembru 2024 sei kontinua halo diskusaun ba proposta-lei OJE 2025 iha faze espesialidade.
Tuir giaun ne’ebé iha diskusaun no votasaun iha espesialidade hahú iha kada artigu, númeru ou alínea, no iha tabela orsamentál ho nia anexu iha proposta-lei OJE 2025, no bainhira iha proposta alterasaun mak sei halo uluk diskusaun no votasaun.
Ba proposta alterasaun aprezenta to’o finál diskusaun no votasaun iha jeneralidade, ne’ebé ho nia giaun no presiza kumpre rekizitu ne’ebé iha, nune’e hodi orienta meza iha serbisu diskusaun no votasaun proposta alterasaun ne’ebé admitidu.
Iha proposta-lei númeru 12/VI(2a) Orsamentu Jerál Estadu (OJE) 2025 hahú husi nia Espozisaun Motivu, no nia iha artigu hamutuk sia (9), ne’ebé hahú husi Kapítulu I Dispozisaun Inisiál, artigu 1 Objetu no ámbitu, Kapítulu II Orsamentu Jerál Estadu, artigu 2 Aprovasaun tabela orsamentál, artigu 3 Impostu, taxa no kontribuisaun, artigu 4 Transferénsia Fundu Petrolíferu, artigu 5 Dívida Públika, artigu 6 Garantia, artigu 7 Transferénsia entre sub-setór.
Kapítulu III Orsamentu Seguransa Sosiál, artigu 8 Transferénsia saldu Seguransa Sosiál, Kapítulu IV Dispozisaun Finál, artigu 9 Entrada ein vigór no produsaun efeitu.
Tuir RPN iha artigu 109.º (Diskusaun), iha alínea 1 hateten diskusaun iha espesialidade foka ba artigu idaidak, la taka dalan ba buat ne’ebé previstu iha númeru tuirmai, no alínea 2 mós haktuir katak sei laiha diskusaun iha espesialidade ba artigu ida se la aprezenta proposta alterasaun ruma kona-ba artigu ne’e.
Nune’e, bainhira ramata diskusaun ba proposta-lei OJE 2025 iha faze espesialidade mak kontinua kedas votasaun iha finál globál.
Tuir ajenda, iha 26 novembru 2024, halo aprovasaun iha finál globál no iha 27 novembru 2024 komisaun C halo redasaun finál ba dekretu PN ne’ebé aprova OJE 2025, hafoin haruka ba Prezidente Repúblika (PR) mak iha kompeténsia eskluziva atu promulga.
Entretantu, tuir observasaun jornalista Agência Tatoli iha terrenu katak, hahú iha tuku 09h00 dadeer ne’e, Primeiru-Ministru (PM), Kay Rala Xanana Gusmão, akompaña husi membru Governu konstitusionál da-sia marka ona prezensa iha sala plenária PN hodi partisipa iha debate ba proposta-lei OJE 2025.
Nune’e mós, reuniaun plenária ne’e lidera direta husi Prezidente Parlamentu Nasionál (PN), Maria Fernanda Lay, akompaña husi kompozisaun meza no marka ona prezensa husi deputadu sira husi bankada parlamentár CNRT, PD, FRETILIN, KHUNTO no PLP iha sala plenária.
Enkuantu, iha 01 outubru 2024, Governu liuhusi Ministra Finansa (MF), Santina Cardoso, aprezenta proposta-lei OJE 2025 ho montante billaun $2,6 ba PN ne’ebé simu direta husi Prezidente Parlamentu Nasionál, Maria Fernanda Lay.
Nune’e, liuhusi reuniaun plenária iha 07 outubru 2024, meza PN anúnsiu no baixa proposta-lei OJE 2025 ba komisaun C ho komisaun permanente sira seluk hodi bele elabora prosesu tuirmai, no iha 16-17 outubru 2024, PN liuhusi komisaun C realiza seminária Panorama Orsamentál 2025.
Iha 18-28 outubru 2024, komisaun permanente sira halo audiénsia públika proposta OJE 2025, hodi konvida liña ministériál no entidade públika sira hodi mai aprezenta relatóriu ezekusaun OJE 2024 no hato’o planu orsamentu 2025 nian.
Notísia relevante: https://tatoli.tl/2024/10/01/governu-submete-proposta-lei-oje-2025-biliaun-2R-ba-pn/
Jornalista : Nelson de Sousa
Editór : Cancio Ximenes
