COVALIMA, 06 Novembru 2024 (TATOLI) – Servisu Munisipál Agrikultura Covalima (SMAC), liuhusi Departamentu Pekuária nia tékniku sira vasina ona karau hamutuk 1.249 hodi hasa’e imunidade, liuliu prevene moras animál nian.
“Atividade vasina karau hahú iha Outubru to’o ohin loron. Dadus atu vasina karau hamutuk karau 5000. Daudaun ne’e, ita konsege vasina ona karau 1.249 no falta 3.751 mak seidauk”, Xefe Departamentu Pekuária Covalima, Urbano Maria Tilman Suri, dehan iha Tabakolot, ohin.
Atividade vasina ne’e hafahe ba ekipa tolu mak hanesan iha postu administrativu Tilomar iha tékniku na’in-ualu, ne’ebé vasina ona karau 476, ekipa iha postu Zumalai iha tékniku na’in-tolu no vasina ona karau 416 no iha Suai iha tékniku na’in-ualu no vasina ona karau 357.
Tékniku sira ne’e vasina karau uza ai-moruk ho naran Septicaemia Epizootica (SE) ka peste karau atu prevene baktéria no vasinasaun ne’e sei halo kada tinan ida dala-ida.
Antes halo vasinasaun ba karau, tékniku sira halo koordenasuan ho xefe suku sira atu fó avizu ba komunidade, maibé bainhira tékniku to’o iha fatin karau-na’in sira hasai ona balada no la fó importánsia vasina.
“Bainhira ami to’o iha fatin, komunidade dehan husik ona sira-nia karau, nune’e difikulta ami atu vasina karau no presiza tempu, maibé ami nafatin halo koordenasaun ho xefe suku sira atu fahe informasaun kona-ba vasina animál”, nia salienta.
Sidadaun Afonso Amaral reforsa katak programa Governu nian, liuhusi tékniku pekuáriu hodi vasina karau sira ne’e importante oinsá atu hasa’e karau nia imunidade hodi prevene moras.
“Ami la’ós la tau importánsia, maibé dalaruma karau barak liu, entaun ita la konsege kesi hotu, nune’e bainhira tékniku sira to’o iha fatin foin mak kesi karau atu vasina hodi prevene moras”, nia esplika.
Lembra katak Diresaun Nasionál Pekuária, Ministériu Agrikultura, Pekuária, Peska no Floresta (MAPPF) hala’o ona vasinasaun masál ba karau sira, ne’ebé hahú ona iha Covalima no Bobonaro.
Programa vasinasaun masál ba karau ne’e sei hala’o iha territóriu, tanba MAPPF observa katak komunidade nia karau mak la hetan vasinasaun ho efetivu bele fó impaktu no bainhira moras bele afeta ba ema nia saúde.
Notísia relevante: Vasinasaun ba karau hahú ona iha munisípiu rua
Jornalista: Celestina Teles
Editora: Maria Auxiliadora
