DILI, 07 novembru 2024 (TATOLI)–Antigu Primeiru-Ministru no no atuál Sekretáriu Jerál partidu Frente Revolusionáriu Timor-Leste Independente (FRETILIN, sigla portugés), Mari Bin Amudi Alkatiri, sujere ba Governu atu garante kualidade ba projetu infraestrutura sira iha Timor-Leste ba prazu naruk tenke liuhusi halo fiskalizasaun.
“Tenke iha gabinete tékniku ida atu prepara projetu, ida-ne’e importante, iha kualidade supervizaun ou fiskalizasaun ne’ebé makaas,” Antigu Primeiru-Ministru ne’e hateten ba jornalista sira liuhusi konferensia imprensa, nakait ho debate proposta Orsamentu Jerál Estadu 2025 ne’ebé daudaun ne’e iha faze jeneralidade, iha Sede Komité Sentrál FRETILIN, iha Comoro.
Iha ezekusaun ba iha kualiadade projetu ne’e buat ida dahuluk akontese mak projetu tenke halo ho kuliadade.
”La’ós kontrariu, agora empreza halo projetu, nia mak ezekuta, entaun sé mak supervizaun no fiskaliza. Emprezariu ba sukat rai, depois ó mak halo,” nia dehan.
Ezemplu, nia dehan, se Governu konstrui estrada tenke iha orsamentu ba iha manutensaun ba estrada ba tinan sira tuir mai.
“Labele halo de’it no halo de’it, depois laiha kontrolu. Kuandu halo infraestrutura ida, iha orsamentu tuir mai tenke iha 15% ba manutensaun. Maibé, kualidade infraestrutura laiha, osan 15% mós la to’o. Tenke iha manutensaun rutina,” nia dehan.
Tanba ne’e, nia fó sujestaun no rekomenda asuntu sira-ne’e, tanba preokupa ho Estadu, povu no rai ida-ne’e nia moris ba loron aban.
“Ha’u preokupa duni ho rai ida-ne’e. Ita gasta osan no laiha rezultadu,” nia dehan.
Sekretáriu Jerál FRETILIN ne’e lamenta ba estrada sira iha kapital ne’ebé sei sai hanesan bee-mota nia fatin, no estrada hadi’a hodi karreta fuzu sira tula sasán todan halo Estrada sai aat hotu no populasaun rega ho bee ne’e sei estraga hotu estrada.
Jornalista : Jesuína Xavier
Editór : Cancio Ximenes
