DILI, 07 outubru 2024 (TATOLI)–Arkivu no Muzeu Rezisténsia Timorense (AMRT,IP) asina akordu ho Eskola Portugueza Dili (EPD) Ruy Cinatti, kinta ne’e, hodi kapasita funsionáriu sira iha institutu ho lian portugés.
“Projetu ne’e sei permite formasaun ba funsionáriu sira Arkivu no Muzeu Rezisténsia Timorense nian, kriasaun materiál edukativu no enkorajamentu uzu lian portugés nian entre foin-sa’e sira, atu nune’e sira labele komunika de’it maibé mós bele kompreende no valoriza ita-nia istória,” Diretór ezekutivu AMRT, I.P, Jorge Alves ‘We moris’ esplika hafoin asina akordu, iha salaun AMRT, I.P, Colmera, kinta ne’e.
Parseria EPD ne’e esensiál ba funsionáriu AMRT, I.P atu komprieende luta nian ho kle’an no fundamentu sira ba identidade Timor-Leste.
“Momentu ida-ne’e reprezenta liu fali formalidade simples ida, reforsa lasu istóriku no kulturál ida-ne’ebé liga Timor-Leste ba Portugal no hafoun kompromisu atu prezerva no hametin ita-nia identidade linguístika no kulturál,” nia akresenta.
Notísia relevante : INFORDEPE fó formasaun lian portugés ba profesór 30 husi Ensinu Sekundáriu
Jorge Alves nota, lian portugés barak liu do que lian ofisiál ida iha Timor-Leste, nune’e lori nia pezu husi istória ida-ne’ebé fahe no ligasaun ne’ebé harii iha sékulu barak nia laran.
“Durante tinan susar liu hanesan momentu rezisténsia, ita-nia líder, intelektuál no kombatente barak komunika ho lian portugés hodi denunsia injustisa sira, fahe luta ba liberdade no autodeterminasaun. Lian portugés nu’udar lian rezisténsia no sai nu’udar símbolu unidade no korrajen ba timoroan tomak. Tanba ne’e, onra boot ida ba AMRT atu kontribui ba kontinuidade legadu ida-ne’e. Nune’e, akordu ne’e la’ós atu reforsa de’it prezensa lian portugés maibé hametin mós ligasaun Timor-Leste ho Portugal inklui nasaun ida-ne’ebé apoia ami iha momentu krusiál sira no kontinua sai parseiru importante iha ami-nia dezenvolvimentu,” nia katak.
Prezidente institutu agradese ba Diretór Eskola Portugueza Dili nia inisiativa no disponibilidade tomak.
“Ho kolaborasaun ida-ne’e, ami reafirma ami-nia determinasaun atu fó onra ba pasadu no harii futuru ida ne’ebé lian portugés kontinua sai ai-riin ida husi Timor-Leste. Atu parseria ne’e dura nafatin no lian portugés sai nafatin ponte ida entre ita-nia nasaun sira no ligasaun ida-ne’ebé hametin espíritu rezisténsia no solidariedade ita-nia povu nian,” tenik nia.
Iha sorin seluk, Diretór EPD Ruy Cinatti, Manuel Alexandre, hateten, objetivu prinsipál mak atu habelar lian no kultura portugés, nune’e agradese ba kooperasaun husi parte rua ne’e.
“Kooperasaun ida-ne’e nu’udár matadalan ida atu ajuda funsionáriu sira bele uza dokumentu ho lian portugés. La’ós de’it formasaun iha lian portugés maka sei sai parte ida maibé oinsá mós fasilita sira atu hahú halo manuál sira kona-ba istória Timor-Leste. Ita sei kolabora serbisu posivelmente kona-ba halo livru manuál sira,” nia dehan.
Jornalista : Osória Marques
Editora : Julia Chatarina
