COVALIMA, 07 Novembru 2024 (TATOLI) – Farmásia Sentru Saúde Tilomar enfrenta problema falta ai-moruk item 200- resin, informa Xefe Sentru Saúde Tilomar, Carlito Sebastião Belo.
Responsavel ne’e dehan Farmásia Sentru Saúde Tilomar iha item ai-moruk hamutuk 240, husi númeru ne’e 39 iha hela farmásia no 200-resin mak stockout.
“Ita hatene ai-moruk stockout la’ós sentru saúde de’it mak enfrenta, maibé problema akontese iha nivel nasionál, tanba bainhira pasiente sira konsulta mak laiha ai-moruk no pesoál saúde orienta komunidade konsumu ai-moruk tradisionál. Administradór postu Tilomar Venâncio Sarmento konsulta bainhira me’ar, maibé tanba stock ai-moruk laiha, ami-nia pesoál orienta administradór konsumu ai-moruk tradisionál, nune’e bele kura moras”, Carlito Belo dehan iha AMC, ohin.
Nia adianta katak ai-moruk ne’ebé falta mak hanesan antibiótika, vitamina no seluk tan.
Iha sorin seluk, Administradór Postu Tilomar, Venâncio Sarmento, husu ba Servisu Saúde Covalima atu rezolve problema falta medikamentu. “Ha’u husu ba diretór atu hato’o pedidu kona-ba Sentru Saúde Tilomar laiha stock ai-moruk ba pasiente sira bainhira halo konsulta”, nia salienta.
Diretór Servisu Munisipal Saúde Covalima, Domingos Sequeira, rekoñese falta medikametu, maibé pesoál saude sira iha alternativa seluk atu fó ai-moruk ba pasiente sira bainhira bá halo tratamentu iha sentru no postu saúde.
“Alternativa ne’ebé pesoál saúde foti, ha’u fó ezemplu ai-moruk paracetamol laiha bele fó ibuprofen, tanba servisu saúde munisipál haree ba kuidadu saúde primaria atu halo prevensaun, bainhira la konsege halo entaun halo transferénsia”, dehan.
Notísia relevante: Suprimentu ai-moruk item 37 mak hotu iha Farmásia Covalima
Jornalista: Celestina Teles
Editora: Maria Auxiliadora
