COVALIMA, 20 Juñu 2024 (TATOLI) – Suprimentu ai-moruk item 37 stockout iha Farmásia Servisu Saúde Covalima atu distribui ba sentru saúde no postu saúde sira.
“Iha Maiu ne’e, ai-moruk item 46 mak stockout no iha Juñu ai-moruk item 37 mak stockout”, Diretór Servisu Saúde Covalima, Domigos Sequeira, informa ohin.
Dirijente ne’e esplika katak, tuir regra, ai-moruk iha farmásia iha item hamutuk 262, husi númeru ne’e falta de’it tipu 37, signifika iha Farmásia Covalima laiha problema kona-ba suprimentu ai-moruk.
Domigos Sequeira salienta katak medikamentu iha Farmásia Covalima mak ai-moruk vitál no nia stockout labele liu semana-ida, tanba ne’e presiza buka meiu atu taka lalais no ai-moruk esensiál nia stockout bele to’o semana-ida ne’e laiha problema.
“Ita esforsu hodi taka hela ai-moruk ne’ebé stockout, maibé ita iha alternativa seluk atu uza, la’ós haree ba ai-moruk item ida de’it. Ai-moruk seluk hanesan paracetamol ita bele uza, nomós ibuprofen, ida ne’e mak uza alternativa seluk no la fó impaktu”, nia esplika.
Lista item ai-moruk stockout mak hanesan Amoxiclax xarope, Azitromicin tablet, Beclometasone inhaler, Bysacodyl lation, Enzyl Benzoate lation, Calamin tablet, Cefixim tableta, Chlopromazine injeksi, Clotrimazole vaginal cream, Clotrimazole vaginal tablet, Cloxacillin xarope, Dexametasone Drops, Diazepam tableta, Diclofenak tablea, Folic acid tablet 5 miligram.
Aleinde ne’e, Folic acid tablet 1 miligram, Sulphate injeksi, Hydrocortisone injeksi, Hyoscine butyilbromide tablet, Ibuprofen xarope, Multi vitamin xarope, Nalisixid acid tablet, Napazoline eye drops, Neomicin powder, Nifedipine tablet, Permetrin cream, Predeusolone tablet, Promethazine xarope, Promethazine injeksi, Promethazine tablet, Pyridoxin vitamin B6 tablet, Salbutamol injeksi, Tramadol tablet, Tramadol injeksi, Vitamin C tablet no Vitamin K1 injeksi.
Pasiente Engracia Abuk agradese ba Governu maske seidauk kompleta ai-moruk ho 100%, maibé balun kompleta daudaun nune’e bele rezolve preokupasaun públika nian kona-ba problema stock ai-moruk ne’ebé durante ne’e iha.
“Foin lalais Farmásia Servisu Saúde Covalima laiha stock ai-moruk item 46, maibé daudaun ne’e ai-moruk item 37 mak falta. Ho stock ai-moruk ne’ebé iha bele distribui lalais ba sentru saúde no postu saúde iha Covalima”, dehan.
Notísia relevante: Farmásia Covalima falta ai-moruk tipu 46
Jornalista: Celestina Teles
Editora: Maria Auxiliadora
